Read Kurmanji Încîl Derketin 30 Bible Online

Derketin 30 - Kurmanji Încîl bible

Derketin 30

¹«Tê ji bo şewitandina bixûrê gorîgehek çêkî. Tê wê ji dara aqasyayê

²û çargoşe çêkî. Dirêjahî û berfirehiya wê gazek[46], bilindahiya wê jî du gaz be. Qiloçên wê ji wê bin.

³Tê ser wê, her aliyê wê û qiloçên wê bi zêrê xas kiras bikî. Tê ji bo dora wê toqeke zêrîn çêkî.

⁴Tê li herdu kêlekên wê, li bin toqa wê du xelekên zêrîn çêkî. Wê ji bo derbaskirina destiyên hilgirtina gorîgehê bin.

⁵Tê van destiyan ji dara aqasyayê çêkî û bi zêr kiras bikî.

⁶Tê gorîgehê deynî pêş perdeya ku li kêleka Sindoqa Şahidiyê ye, pêş derxûn[47], wê dera ku ezê lê te bibînim.

⁷«Wê Harûn li ser gorîgehê bixûra bêhnxweş pêxe. Her sibe gava li qendîlan binêre, wê pê bixe.

⁸Ber êvarê jî gava qendîlan amade bike, wê dîsa bixûrê pê bixe. Bi vî awayî wê di nav nifşên we de, li hizûra Xudan her û her bixûr were pêxistin.

⁹Hûnê li ser gorîgehê bixûreke din, qurbana şewitandinê yan pêşkêşiya dexlê pêşkêş nekin û pêşkêşiya rijandinê nerijînin.

¹⁰Wê Harûn salê carekê paqijî û kefareta qiloçên gorîgehê bike. Wê Harûn û ziriyeta wî, di nav nifşên we de salê carekê, bi xwîna qurbana paqijiyê ku hatiye pêşkêşkirin, gorîgehê paqij bikin. Ev ji Xudan re bi zêdebarî pîroz e.»

¹¹Xudan ji Mûsa re got:

¹²«Gava te hejmara gelê Îsraîl hejmart, wê herkes ji bo canê xwe berdêlê bide Xudan ku gava hejmartinê bela neyê serê wan.

¹³Her kesê ku hatiye hejmartin, wê wekî pêşkêşî, li gorî nîv şekelê Pîrozgehê[48] bide min — şekelê Pîrozgehê bîst gera ye.

¹⁴Her kesê bijartî yê ku bîst salî û di ser bîstî re ye, wê pêşkêşî bide min.

¹⁵Gava we wekî kefareta canê xwe ev pêşkêşî da Xudan, wê dewlemend ji şekelekî zêdetir, belengaz ji şekelekî kêmtir nede.

¹⁶Tê ji gelê Îsraîl pereyê kefaretê bidî hev û di xizmeta Konê Hevdîtinê de bixebitînî. Wê ev wekî kefareta canê we, gelê Îsraîl li ber Xudan bi bîr bîne.»

¹⁷Xudan ji Mûsa re got:

¹⁸«Ji bo xweşûştinê teşteke tûncîn çêke, bila lingên wê jî ji tûnc bin. Tê wê deynî navbera Konê Hevdîtinê û gorîgehê û bi avê dagirî.

¹⁹Wê Harûn û kurên wî dest û lingên xwe li wê derê bişon.

²⁰Çaxê ew ketin Konê Hevdîtinê an jî gava pêşkêşiya şewitandinê pêşkêşî Xudan dikin û ji bo perizînê nêzîkî gorîgehê dibin, ji bo ku nemirin divê xwe bi avê bişon.

²¹Ji bo ku nemirin, wê dest û lingên xwe bişon. Wê ev yek ji bo Harûn û ziriyeta wî, di nav nifşên wan de qanûneke herheyî be.»

²²Xudan ji Mûsa re got:

²³«Tu van biharatên hêja bistîne: 500 şekel[49] rûnê mûr, nîvê wê, yanê 250 şekel darçîna bêhnxweş û ewqas jî qamîşê bêhnxweş,

²⁴li gorî şekelê Pîrozgehê 500 şekel xiyarşembe û hînek[50] rûnê zeytê bikire.

²⁵Tê bi hosteyî ji van rûnê pîroz ê bêhnxweş çêkî. Wê bibe rûnê pîroz.

²⁶Tê bi vî rûnî Konê Hevdîtinê, Sindoqa Şahidiyê,

²⁷mase û hemû taximên wê, şamdank û taximên wê, gorîgeha bixûrê,

²⁸gorîgeha qurbana şewitandinê û taximên wê, teşta wê tevî lingên wê rûn bikî.

²⁹Tê wan pîroz bikî ku wê bi zêdebarî pîroz bibin. Her tiştê ku bi wan bibe, wê pîroz bibe.

³⁰«Ji bo ku ji min re kahintiyê bikin, tê Harûn û kurên wî rûn bikî û wan pîroz bikî.

³¹Tê ji gelê Îsraîl re bibêjî: ‹Wê ev rûnê kifşkirinê yê pîroz, di nav nifşên we de tenê ji bo min bê xebitandin.

³²Wê bi ser bedena mirov de neyê rijandin. Tê bi awayê hatiye çêkirin, ji wê tu rûn çênekî. Ew pîroz e û wê ji bo we pîroz be.

³³Kesê ku rûnekî wekî wê çêke û bi ser yekî ku ne kahin e de birijîne, wê ji nav gelê xwe bê avêtin.›»

³⁴Xudan ji Mûsa re got: «Tu ji bo xwe biharatên bêhnxweş — guniya reş, onîka[51], kasnî û guniya xas — hilde. Wê pîvana hemûyan yek be.

³⁵Tê bi hosteyî ji vana bixûrek bêhnxweş çêkî. Wê bi xwê be xas û pîroz be.

³⁶Tê hinekî ji wê biperçiqînî û bikî hûr û hela, li Konê Hevdîtinê, deyne pêş Sindoqa Şahidiyê, dera ku ezê te bibînim. Wê ev ji bo we bi zêdebarî pîroz be.

³⁷Wekî wê bixûra ku te çêkiriye, tê ji bo xwe bixûrê çênekî. Li gorî te wê ev ji Xudan re pîroz be.

³⁸Kî ji bo bêhnkirinê bixûrek wisa çêke, wê ji nav gelê xwe bê avêtin.»