Read Kurmanji Încîl Derketin 31 Bible Online

Derketin 31 - Kurmanji Încîl bible

Derketin 31

¹Xudan ji Mûsa re got:

²«Binêre, min bi navê wî gazî Besalêlê kurê Ûrîyê kurê Hûrê ku ji eşîra Cihûda ye kir.

³Min ew bi ruhê xwe, bi şehrezayî, fêmdarî, zanîn û bi her cure hostetiyê tije kir

⁴ku ew li karên bi hosteyî bifikire, şikil bide zêr, zîv û tûncê

⁵û di karên birîn û pêvekirina keviran, necarî û her cure hostiyê de bixebite.

⁶Herwiha min Oholîavê kurê Ahîsamakê ku ji eşîra Dan e da kêleka wî. Ji bo karên ku min li te emir kirine pêk bînin, min şehrezayî da hemû kesên jêhatî.

⁷Ji bo ku ew Konê Hevdîtinê, Sindoqa Şahidiyê, derxûnê[52] li ser wê, hemû taximên kon,

⁸mase û taximên wê, şamdanka zêrê xas û hemû taximên wê, gorîgeha bixûrê,

⁹gorîgeha qurbana şewitandinê û hemû taximên wê, teşta wê tevî lingê wê,

¹⁰kincên tenik honandî, kincê pîroz ê Harûnê Kahin û kincên kurên wî,

¹¹rûnê kifşkirinê û bixûra bêhnxweş a ji bo Cihê Pîroz, bi awayê ku min li te emir kiriye, çêkin.»

¹²Xudan ji Mûsa re got:

¹³«Ji gelê Îsraîl re bêje: ‹Hûnê rojên min ên Septê bi rastî jî bigirin, çimkî ew nîşanek wisa ye ku wê di navbera min û we de di nav nifşên we de bajo. Bi vî awayî hûnê bizanibin Xudanê ku we pîroz dike ez im.

¹⁴«‹Ji ber vê yekê hûnê Septê bigirin, çimkî ew ji bo we pîroz e. Kesê ku wê mirdar bike divê esse bê kuştin. Wê rojê kî bixebite, wê ji nav gelê xwe bê avêtin.

¹⁵Wê şeş rojan kar bê kirin, lê roja heftan roja bêhnvedanê Sept e. Ev roj ji Xudan re pîroz e. Her kî ku Roja Septê bixebite divê esse bê kuştin.

¹⁶Loma divê Îsraîlî Septê bigirin, wekî peymaneke herheyî di nav nifşên xwe de Septê pîroz bikin.

¹⁷Ew di navbera min û gelê Îsraîl de nîşanek herheyî ye. Çimkî Xudan erd û ezman di şeş rojan de çêkir û di roja heftan de xwe rihet kir, bêhna xwe veda.›»

¹⁸Gava Xwedê li Çiyayê Sînayê gotinên xwe bi Mûsa re xilas kirin, wî du lewheyên kevirîn ên şahidiyê ku Xwedê bi tiliya xwe li ser wan nivîsîbûn dan wî.