Read Kurmanji Încîl Derketin 32 Bible Online

Derketin 32 - Kurmanji Încîl bible

Derketin 32

¹Gava gel dît ku Mûsa ji daketina çiyê bi derengî ket, ew li ba Harûn civiyan û jê re gotin: «Rabe, îlahekî çêke ku li pêşiya me be. Çimkî em nizanin çi hat serê zilamê ku em ji welatê Misrê deranîn.»

²Harûn ji wan re got: «Guharên zêrîn ên ku di guhê jinên we, lawên we û keçên we de ne derxin û wan ji min re bînin.»

³Tevahiya gel rabû hemû guharên zêrîn ên di guhên xwe de derxistin û ew anîn ba Harûn.

⁴Harûn zêr ji wan standin, bi amûra qewirandinê şikil dayê û jê golikekî rijandî[53] çêkir. Wî çaxî gel got: «Ya gelê Îsraîl, îlahê te yê ku tu ji welatê Misrê deranî ev e.»

⁵Çaxê Harûn ev dît, wî li pêş golikê gorîgehek çêkir, gazî kir û got: «Sibê ji bo Xudan cejn e.»

⁶Dotira rojê ew zû rabûn, qurbanên şewitandinê pêşkêş kirin û pêşkêşiyên aştiyê anîn. Gel rûnişt, xwar û vexwar. Paşê rabû da lotikan û bi hev lîstin.

⁷Xudan ji Mûsa re got: «Rabe berjêr be! Gelê te yê ku te ji welatê Misrê deranî xera bû.

⁸Ew zû ji riya min li wan emir kir averê bûn. Wan ji bo xwe golikekî rijandî çêkir, perizînê, jê re qurban dan û gotin: ‹Ya gelê Îsraîl, îlahê te yê ku tu ji welatê Misrê deranî ev e.›»

⁹Xudan ji Mûsa re got: «Min ev gel dît, ev miletekî serhişk e.

¹⁰Niha bihêle, bila hêrsa min li dijî wan rabe ku ez wan biqedînim. Paşê ezê te bikim miletekî mezin.»

¹¹Lê Mûsa ji Xwedê lava kir û got: «Ya Xudan, wê çima hêrsa te li dijî gelê te rabe? Te ew ji welatê Misrê bi hêza xwe ya mezin û bi destê xwe yê hêzdar deranî.

¹²Wê çima Misrî bêjin: ‹Xwedê ji bo xerabiyê, ji bo ku wan li çiyan bikuje û wan ji ser rûyê erdê tune bike ew ji Misrê deranî›? Ji hêrsa xwe vegere. Fikra xwe biguhere û wê xerabiyê bi gelê xwe neke.

¹³Xulamên xwe Îbrahîm, Îshaq û Îsraîl bi bîr bîne. Te ji wan re bi navê xwe sond xwar û got: ‹Ezê ziriyeta we bi qasî stêrên ezmanan zêde bikim. Ezê tevahiya vî welatê ku min soz dabû bidim ziriyeta we. Wê bibe mîrasa wan a herheyî.›»

¹⁴Bi vî awayî Xudan fikra xwe guhert û xerabiya ku gotibû, bi gelê xwe nekir.

¹⁵Mûsa zivirî, di destan de du lewheyên peymanê ku emir li ser nivîsandî bûn, ji çiyê berjêr bû. Herdu aliyên lewheyan jî nivîsandî bûn.

¹⁶Lewhe karê Xwedê bûn, nivîsa qewirandî ya li ser lewheyan ya Xwedê bû.

¹⁷Gava Yêşû qîrîna gel bihîst, ji Mûsa re got: «Dengê şer ji artêşgehê tê!»

¹⁸Lê Mûsa got: «Ev ne dengê serketiyan e, Ne jî dengê têkçûyiyan e. Ez dengê stranan dibihîzim.»

¹⁹Gava Mûsa nêzîkî artêşgehê bû, golik û kesên direqisin dîtin, hêrsa wî rabû bû. Lewheyên di destên xwe de avêtin û ew li qûntara çiyê xistin û şikandin.

²⁰Wî golikê ku wan çêkiriye hilda, şewitand û heta bû toz perçiqand. Wî ev toz bi ser avê de reşand û bi gelê Îsraîl da vexwarin.

²¹Mûsa ji Harûn re got: «Vî gelî çi bi te kir ku te ev gunehê mezin bi serê wan de anî?»

²²Harûn got: «Hêrs nebe xweyê min, tu dizanî meyla gel li ser xerabiyê heye.

²³Çimkî wan ji min re got: ‹Rabe, îlahekî çêke ku li pêşiya me be. Çimkî em nizanin çi hat serê zilamê ku em ji welatê Misrê deranîn.›

²⁴Min jî ji wan re got: ‹Bi kê re zêr hebe, bila derxe û bîne min.› Wan zêr dan min, min ew avêt nav êgir û ev golik derket!»

²⁵Mûsa dît ku gel serberdayî bûye. Çimkî Harûn ew serberdayî hiştibûn û bibû sedem ku bibin pêkenînê dijminên xwe.

²⁶Mûsa li dergehê artêşgehê sekinî û got: «Kesên li alî Xudan in bila werin ba min.» Li ser vê yekê tevahiya Lêwiyiyan li ba wî kom bûn.

²⁷Wî ji wan re got: «Xwedayê Îsraîl Xudan wiha dibêje: ‹Bila herkes şûrê xwe li pişta xwe girê bide, li artêşgehê ji deriyekî here ber deriyê din, birayê xwe, hevalê xwe û cîranê xwe bikuje.›»

²⁸Lêwiyiyan bi awayê ku Mûsa ji wan re got kirin û wê rojê ji gel bi qasî sê hezar kes hatin kuştin.

²⁹Mûsa got: «Îro, ji bo ku pîroziyê bide we, xwe ji Xudan re veqetînin. Çimkî herkes li dijî kurê xwe û birayê xwe rabû.»

³⁰Dotira rojê Mûsa ji gel re got: «We sûcek mezin kir. Niha ezê herim hizûra Xudan, ji bo gunehên we navbeynkarî û kefaretê bikim.»

³¹Mûsa çû hizûra Xudan û jê re got: «Heyf! vî gelê hanê gunehekî mezin kir. Wan ji xwe re pûtekî zêrîn çêkir.

³²Lava dikim gunehê wan bibexişîne yan na navê min ji wê nivîsa ku te nivîsiye, derxe.»

³³Xudan ji Mûsa re got: «Her kî ku li dijî min guneh kiribe, ezê navê wî ji nivîsa xwe derxim.

³⁴Rabe here gel bibe cihê min ji te re got. Wê milyaketê min jî bide pêşiya te. Roja cezakirinê, ezê wan ji ber gunehên wan ceza bikim.»

³⁵Xudan gel ceza kir, çimkî wan bi Harûn golik dabû çêkirin.