Read Kurmanji Încîl Derketin 34 Bible Online

Derketin 34 - Kurmanji Încîl bible

Derketin 34

¹Xudan ji Mûsa re got: «Ji bo xwe, wekî yên pêşî du lewheyên kevirîn bibire. Gotinên li ser lewheyên pêşî bûn û te ew şikandin, ezê li ser wan binivîsim.

²Şeveqê amade be û serê sibê hilkişe Çiyayê Sînayê û li ser çiyê, li ber min bisekine.

³Wê tu kes bi te re hilnekişe ser çiyê û bila li tevahiya çiyê kes neyê dîtin û li qûntara çiyê pez û dewar neçêre.»

⁴Mûsa wekî yên pêşî, du lewheyên kevirîn birîn û wekî ku Xudan lê emir kiribû serê sibê zû rabû hilkişiya ser Çiyayê Sînayê. Wî herdu lewhe da destê xwe û birin.

⁵Xudan bi ewr re daket, li wir pê re ma û navê xwe, navê Xudan eşkere kir.

⁶Xudan di ber wî re derbas bû û got: «Ez Xudan im, Xwedayê dilrehm û keremdar, zû hêrs nabe, dilsozî û dilovaniya wî zêde ye.

⁷Ez dilovaniya xwe nîşanî hezaran didim. Neheqî, guneh û sûcan dibexişînim. Ez kesê sûcdar bêceza nahêlim û hesabê gunehê bavan ji kuran, ji kurê kuran, ji nifşê sisê û çaran distînim.»

⁸Mûsa zûka deverû çû erdê û perizî.

⁹Wî got: «Ya Reb, heger dilê te bi min xweş be, ez hêvî dikim, kerem bike bi me re were. Çimkî ev miletekî serhişk e. Neheqî û gunehên me bibexişîne û me bike mîrasa xwe.»

¹⁰Xudan got: «Niha ez peymanekê çêdikim. Ezê li pêş tevahiya gelê te karên nedîtî bikim ku li tevahiya dinyayê û di nav miletên din de karên wiha nehatibin kirin. Hemû gelê ku tu di nav de dijî wê karên Xudan bibîne. Çimkî karê ku ezê bi te re bikim gelek biheybet e.

¹¹Emrên ku îro ez li te dikim pêk bîne. Tê bibînî, ezê ji ber te Amorî, Kenanî, Hîtîtî, Perîzzî, Hîwî û Yevûsiyan biqewirînim.

¹²Miqate bin ku bi mirovên welatê ku tê heriyê re peymanekê çêneke. Çimkî ev dikare ji bo te bibe dafik.

¹³Hûnê gorîgehên wan hilweşînin, kêlên wan ên kevirîn perçe bikin û pûtên wan ên Aşêrayê bibirin.

¹⁴Çimkî tê neperizî îlahan. Ez Xudan im. Navê min Xîret e. Xwedayekî bixîret im.

¹⁵Tê bi mirovên welatê ku tê heriyê re peymanekê çênekî. Çimkî gava ew diperizin[55] pûtên xwe û ji bo wan qurban didin, wê gazî te jî bikin û tê herî bixwî.

¹⁶Tê keçên wan ji kurên xwe re neyinî. Çimkî gava keçên wan biperizin pûtên xwe, wê bikin ku kurên te bêbextî bikin û bi wan re biperizin pûtên wan.

¹⁷«Tê ji bo xwe pûtên rijandî çênekî.

¹⁸«Tê Cejna Nanê Şikeva bikî. Çawa ku min li te emir kir, tê di rojên kifş ên meha Avîvê de, heft rojan Cejna Nanê Şikeva pîroz bikî. Çimkî tu di meha Avîvê de ji Misrê derketî.

¹⁹«Hemû kurên pêşî yên min in; çi dewar, çi pez, hemû heywanên nêr ên pêşî yên min in.

²⁰Tê ji bo dehşikê pêşî pezekî fîdyeyê bidî. Heger tu fîdyeyê nedî, tê stûyê dehşikê bişikênî. Divê tu ji bo hemû kerên xwe yên pêşî fîdyeyê bidî. «Bila tu kes destvala neyê hizûra min.

²¹«Tê şeş rojan bixebitî, lê di roja heftan de bêhna xwe vedî. Tê di dema çandin û çinînê de jî bêhna xwe vedî.

²²«Tê di dema pêşî ya dirûtina genim de Cejna Hefteyan, di dawiya salê de Cejna Berhilanînê bikî.

²³Wê hemû mêrên te salê sê caran derkevin hizûra Reb Xudan, Xwedayê Îsraîl.

²⁴Çimkî ezê ji ber we miletan biqewirînim û sînorên te fireh bikim. Gava tu salê sê caran herî hizûra Xwedayê xwe Xudan, wê tu kes çav bernede welatê te.

²⁵«Tê xwîna qurbana min bi nanê bihevîrtirş serjê nekî. Wê qurbana Cejna Derbasbûnê nemîne serê sibê.

²⁶«Tê berê pêşî yê bijare yê axa xwe, bînî Mala Xwedayê xwe Xudan. «Tê karikê, li ber şîrê diya wî nekelînî.»

²⁷Xudan ji Mûsa re got: «Van peyvan binivîse. Çimkî min bi te re û bi Îsraîl re li gorî van peyvan peyman çêkir.»

²⁸Mûsa li wir çil şev û çil rojan bi Xudan re ma. Wî ne nan xwar û ne jî av vexwar. Wî li ser lewheyên gotinên peymanê deh emir nivîsî.

²⁹Mûsa di destê wî de du lewheyên peymanê ji Çiyayê Sînayê hat xwarê. Ji ber ku bi Xudan re peyivîbû rûyê wî dibiriqî. Lê haya wî ji vê tunebû.

³⁰Gava Harûn û tevahiya gelê Îsraîl rûyê Mûsa yê dibiriqî dîtin, ew tirsiyan ku nêzîkî wî bibin.

³¹Mûsa gazî wan kir. Harûn û hemû serekên civata Îsraîl li wî vegeriyan û Mûsa bi wan re peyivî.

³²Hemû Îsraîlî nêzîk bûn û Mûsa hemû tiştên ku Xudan li Çiyayê Sînayê jê re gotibûn li wan emir kir.

³³Piştî ku Mûsa gotinên xwe bi wan re xilas kirin, wî xêliyek danî ser rûyê xwe.

³⁴Lê gava Mûsa ji bo peyivînê diçû hizûra Xudan, heta ji hizûra wî vediqetiya, xêliya li ser rûyê xwe radikir. Çaxê ew dizivirî, emrên ku lê hatibûn kirin ji gelê Îsraîl re digot.

³⁵Wî çaxî gelê Îsraîl rûyê Mûsa yê dibiriqî didîtin. Gava Mûsa diket hûndir ji bo dîtina Xudan, xêliya xwe dîsa datanî ser rûyê xwe.