Read Kurmanji Încîl Derketin 35 Bible Online

Derketin 35 - Kurmanji Încîl bible

Derketin 35

¹Mûsa tevahiya civata Îsraîl civand û ji wan re got: «Tiştên ku Xudan kirina wan li we emir kirine ev in:

²Divê şeş rojan kar bê kirin. Lê divê roja heftan ji bo we Septa pîroz, roja bêhnvedanê ya ji Xudan re veqetandî be. Her kesê ku wê rojê bixebite wê bê kuştin.

³Hûnê Roja Septê di malên xwe de êgir pênexin.»

⁴Mûsa ji tevahiya civata Îsraîl re got: «Tiştên ku Xudan emir kiriye ev in:

⁵Di nav xwe de ji bo Xudan pêşkêşiyan bînin. Her kesê ku dixwaze, bila pêşkêşiya Xudan ya zêr, zîv, tûnc,

⁶tayên şînê tarî, binevşî û sor, kitanê tenik û mûyê bizinê,

⁷çermê beran ê bi hibra sor û şînê tarî[56], dara aqasyayê,

⁸rûnê zeytê yê qendîlan, biharatên rûnê kifşkirinê û bixûra bêhnxweş,

⁹kevirên onîks û kevirên din ên hêja ku li ser êfod û bersing bên rêzkirin, bînin.

¹⁰«Wê hemû kesên jêhatî yên nav we bên û her tiştên ku Xudan emir kiriye bikin;

¹¹mesken, kon û xêliya wî, qopçe, çîtên çik, girş, stûn, binik,

¹²sindoq û destiyên wê, derxûn[57], perdeya jihevqetandinê,

¹³mase, destî û hemû taximên wê, hemû taximên wê, Nanê Hizûrê,

¹⁴ji bo ronahiyê şamdank û taximên wê, qendîl, rûnê zeytê yê qendîlan,

¹⁵gorîgeha bixûrê û destiyên wê, rûnê kifşkirinê, bixûra bêhnxweş, perdeya deriyê meskên,

¹⁶gorîgeha qurbana şewitandinê, serada wê ya tûncîn, destî û hemû taximên wê, teşta wê tevî lingên wê,

¹⁷perdeyên dora hewşê, stûn û binikên wê, perdeya deriyê hewşê,

¹⁸singên meskên û hewşa wî û qeytanên wan,

¹⁹kincên tenik honandî yên xizmeta Cihê Pîroz, kincên Harûnê Kahin û kincên kurên wî yên kahintiyê çêkin.»

²⁰Tevahiya civata Îsraîl ji ba Mûsa çû.

²¹Her kesê dilxwaz û heweskar berê xwe da xizmeta Konê Hevdîtinê, ji bo kincên pîroz pêşkêşî ji Xudan re anî.

²²Mêr û jin, hemû kesên dilxwaz hatin, ji bo Xudan wekî pêşkêşî broş, guhar, gustîl û bazin anîn. Hemû zînetên ku anîn ji zêr bûn.

²³Hemû kesê ku xweyê tayên şînê tarî, binevşî û sor, kitanê tenik, mûyê bizinê, çermê beran ê bi hibra sor û şînê tarî bibe, van tiştan anîn.

²⁴Her kesê ku dikaribû pêşkêşiya zîv û tûnc bidin, wan ew wekî pêşkêşî Xudan dan. Ji bo ku di karekî de bê xebitandin, bi kê re dara aqasyayê hebe anî.

²⁵Hemû jinên jêhatî, rîsê sor, binevşî, şînê tarî û kitanê tenikê ku bi destê xwe honandibûn anîn.

²⁶Bi ser de jinên zana û jêhatî û bi kêr mûyê bizinê jî honandin.

²⁷Serekan ji bo li ser êfod û bersingê rêzkirinê, kevirên onîks û kevirên din ên hêja,

²⁸biharat, rûnê zeytê yên ji bo qendîl, kifşkirin û bixûra bêhnxweş anîn.

²⁹Mêr û jin hemû Îsraîliyên dilxwaz, ji bo karên ku Xudan bi riya Mûsa li wan emir kiribûn, wan ji Xudan re pêşkêşiya dilxwaziyê anîn.

³⁰Mûsa ji gelê Îsraîl re got: «Binêrin, Xudan bi navê wî gazî Besalêlê kurê Ûrîyê kurê Hûrê ku ji eşîra Cihûda ye kir.

³¹Wî ew bi Ruhê Xwedê, bi şehrezayî, fêmdarî, zanîn û bi her cure hostetiyê tije kir

³²ku ew li karên bi hosteyî bifikire, şikil bide zêr, zîv û tûncê

³³û di karên birîn û pêvekirina keviran, necarî û her cure hostiyê de bixebite.

³⁴Herwiha Xudan daxwaza hînkirinê xist dilê wî û Oholîavê kurê Ahîsamakê Danî.

³⁵Wî dilê wan bi şehrezayî tije kir ku ew di her karê ku hosteyî jê re dixwaze de, di karê necarî, di karê çêkirina rîsê tayên şînê tarî, binevşî û sor û kitanê tenik de, di karê honandin û nexişandinê de, di her cure karî de afirîner bin.