Read Kurmanji Încîl Derketin 38 Bible Online

Derketin 38 - Kurmanji Încîl bible

Derketin 38

¹Besalêl gorîgeha qurbana şewitandinê ji dara aqasyayê çargoşe çêkir. Dirêjî û berfirehiya wê pênc gaz[67], bilindahiya wê sê gaz bû.

²Wî li ser her çar kujên jorîn qiloç çêkirin ku pê ve bûn yek perçe. Wî ew bi tûnc kiras kir.

³Wî hemû taximên gorîgehê; sîtil, bêr, tasik, sêgoyên goşt û bixûrdankan, ji tûnc çêkirin.

⁴Ji bo gorîgehê, ji bin keviya wê heta nîvî, wî wekî torê serada tûncîn çêkir.

⁵Wî li her çar kêlekên serada tûncîn ji bo hilgirtinê destiyan çêkirin.

⁶Wî destî ji dara aqasyayê çêkirin û bi tûnc kiras kirin.

⁷Ji bo hilgirtina gorîgehê, wî destî li xelekên kêlekan xist. Wî gorîgeh ji textikan çêkir ku hûndirê wê vala be.

⁸Wî ji neynikên jinên ku li ber deriyê Konê Hevdîtinê xizmet dikirin, teşteke tûncîn a ku lingên wê jî tûnc bûn çêkir.

⁹Wî hewş çêkir. Wî perdeyên hewşê yên li aliyê başûr, ji kitanê tenik honandî û bi dirêjahiya sed gaz[68] çêkirin.

¹⁰Bîst stûn û binikên wan ên perdeyan ji tûnc bûn. Çengelên stûnan û bistên wan ji zîv bûn.

¹¹Ji bo aliyê bakur wî perdeyên dirêjahiya sed gaz çêkirin. Bîst stûnên û bîst binikên wan ji tûnc, çengelên stûnan û bistên wan ji zîv bûn.

¹²Li aliyê rojavayê hewşê perde hebûn ku bejna wan pêncî gaz[69] e. Deh stûn û deh binik jî hebûn. Çengelên stûnan û bistên wan ji zîv bûn.

¹³Berfirehiya aliyê hewşê yê ku li rojhilat dinêre pêncî gaz bû.

¹⁴Li aliyekî deriyê hewşê perdeyeke panzdeh gaz[70], sê stûn û sê binik hebûn.

¹⁵Li aliyê din ê deriyê hewşê jî perdeyeke panzdeh gaz, sê stûn û sê binik hebûn.

¹⁶Hemû perdeyên li der û dora hewşê, ji kitanê tenik honandî hatibûn çêkirin.

¹⁷Binikên stûnan ji tûnc, çengelên stûnan û bistên wan ji zîv bûn. Serî bi zîv hatibûn kiraskirin. Hemû stûnên hewşê bi çemberên zîv hatibûn pêçan.

¹⁸Perdeya deriyê hewşê ya binexş, ji kitanê tenik honandî û tayên şînê tarî, binevşî û sor hatibû çêkirin. Dirêjahiya vê perdeyê bîst gaz[71], bilindahiya wê, wekî perdeyên hewşê pênc gaz bû.

¹⁹Ji tûnc çar stûn û çar binikê wê hebûn. Çengelên stûnan, serî û bistên wan ji zîv bû.

²⁰Hemû singên meskên û hewşa dora meskên, ji tûnc bûn.

²¹Hemû hesabê malzemeyên ku di çêkirina meskên de hatibûn bikaranîn, li gorî emrê Mûsa, di bin destê Îtamarê kurê Harûnê Kahin de, ji aliyê Lêwiyiyan ve hatin qeydkirin. Lewheyên ku Deh Emir li ser hatibûn nivîsandin li vir dihatin parastin.

²²Hemû karên ku Xudan li Mûsa emir kiribû, ji eşîra Cihûda, Besalêlê kurê Ûriyê kurê Hûr kir.

²³Oholîavê kurê Ahîsamakê ji eşîra Dan jî jê re bû alîkar. Ew necar, di karê tayên şînê tarî, binevşî û sor û kitanê tenik de nexişkarekî hoste bû.

²⁴Zêrê ku di çêkirina hemû karên konê pîroz de hat bikaranîn, li gorî şekelê Pîrozgehê 29 telant û 730 şekel[72] bû.

²⁵Zîvê ji civatê bûn û hatibûn hejmartin, li gorî şekelê Pîrozgehê 100 telant û 1 775 şekel[73] bû.

²⁶603 550 kesên ku hatibûn hejmartin û emrê wan bîst û di ser bîstî re bû, serê kesê bekayek, yanî li gorî nîv şekelê Pîrozgehê[74] diket.

²⁷Ji bo pîrozgehê û rijandina binikên perdeyan 100 telant[75] zîv hat xebitandin. Ji bo her binikekê telantek, ji bo sed binikî sed telant zîv hat xerckirin.

²⁸Ji bo çengelên stûnan, pêçana serî û gopîtan 1.775 şekel[76] hat xerckirin.

²⁹Tûncê ku hatibû dayîn 70 telant 2 400 şekel[77] bû.

³⁰Bi wî binikên deriyê Konê Hevdîtinê, gorîgeha tûncîn û serada wê yên tûncîn, hemû taximên gorîgehê,

³¹binikên dora hewşê, binikên deriyê hewşê, hemû singên meskên û hemû singên dora hewşê çêkirin.