Read Kurmanji Încîl Derketin 40 Bible Online

Derketin 40 - Kurmanji Încîl bible

Derketin 40

¹Xudan ji Mûsa re got:

²«Tê meskenê Konê Hevdîtinê di roja pêşî ya meha pêşî de çêkî.

³Tê Sindoqa Şahidiyê deynî wê derê û bi perdeyê veşêrî.

⁴Tê maseyê bînî hûndir û tiştên li ser wê rêz bikî. Tê şamdankê bînî hûndir û qendîlên wê bi cih bikî.

⁵Tê gorîgeha zêrîn a bixûrê deynî pêş Sindoqa Şahidiyê û perdeyê bavêjî ser deriyê kon.

⁶Tê gorîgeha qurbana şewitandinê deynî ber deriyê meskenê Konê Hevdîtinê.

⁷Tê teştê deynî navbera Konê Hevdîtinê û gorîgehê û hûndirê wê bi avê dagirî.

⁸Tê li dora kon hewşê çêkî û perdeyê bavêjî deriyê hewşê.

⁹«Tê rûnê kifşkirinê hildî, kon û hemû tiştên tê de rûn bikî. Tê wê û hemû taximên wê pîroz bikî ku pîroz be.

¹⁰Tê gorîgeha qurbana şewitandinê û hemû taximên wê rûn bikî. Tê gorîgeh pîroz bikî ku bi zêdebarî pîroz be.

¹¹Tê teştê tevî lingê wê rûn û pîroz bikî.

¹²«Tê Harûn û kurên wî bînî ber deriyê Konê Hevdîtinê, wan bi avê bişoyî

¹³û kincên pîroz li Harûn bikî. Ji bo ku ji min re kahintiyê bike, tê wî rûn bikî ku pîroz be.

¹⁴Tê kurên wî jî bînî û mîntanan li wan bikî.

¹⁵Ji bo ku ew ji min re kahintiyê bikin, çawa te bavê wan rûn kir, tê wan jî rûn bikî. Wê rûnkirina wan bike ku ew di nav nifşên xwe de kahintiya herheyî bikin.»

¹⁶Mûsa her tişt bi awayê ku Xudan lê emir kiribû kir.

¹⁷Di roja pêşî ya meha pêşî ya sala diduyan de kon hat vedan.

¹⁸Mûsa kon veda, binikên wî danîn, çîtên wî daçikandin, stûnên wî rakirin û girşên wî lêxistin.

¹⁹Wî kon li ser meskên nixamt û xêlî ser kon nixamt, wekî ku Xudan lê emir kiribû.

²⁰Wî Lewheyên Şahidiyê hildan û xistin hûndirê sindoqê. Destiyên sindoqê lê xistin, derxûn[80] ji jor ve danî ser sindoqê.

²¹Wî sindoq anî hûndirê meskên, perdeya jihevqetandinê lêxist û Sindoqa Şahidiyê veşart, wekî ku Xudan lê emir kiribû.

²²Wî mase anî hûndirê Konê Hevdîtinê, li aliyê bakurê meskên, li derveyî perdeyê bi cih kir

²³û li hizûra Xudan nan li ser rêz kirin, wekî ku wî lê emir kiribû.

²⁴Mûsa şamdank anî Konê Hevdîtinê, li hember maseyê, li aliyê başûrê meskên bi cih kir

²⁵û li hizûra Xudan qendîl pêxistin, wekî ku wî lê emir kiribû.

²⁶Wî gorîgeha zêrîn, li Konê Hevdîtinê danî pêşberî perdeyê

²⁷û li serê bixûra bêhnxweş pêxist, wekî ku Xudan lê emir kiribû.

²⁸Wî perdeya deriyê kon lêxist,

²⁹gorîgeha qurbana şewitandinê danî ber derê meskenê Konê Hevdîtinê û li ser wê qurbana şewitandinê û pêşkêşiya dexlê pêşkêş kir, wekî ku Xudan lê emir kiribû.

³⁰Wî teşt danî navbera Konê Hevdîtinê û gorîgehê û ji bo şûştinê bi avê dagirt ku

³¹Mûsa, Harûn û kurên Harûn dest û lingên xwe li wir dişûştin.

³²Her gava ew diketin Konê Hevdîtinê û nêzîkî gorîgehê dibûn, wan dest û lingên xwe dişûştin, wekî ku Xudan li Mûsa emir kiribû.

³³Wî hewş li dora kon û gorîgehê çêkir û perde avêt ser deriyê hewşê. Bi vî awayî Mûsa kar temam kir.

³⁴Ewr ser Konê Hevdîtinê nixamt û rûmeta Xudan mesken dagirt.

³⁵Mûsa nikaribû biketa Konê Hevdîtinê, çimkî ewr li ser wê disekinî û rûmeta Xudan mesken tije kiribû.

³⁶Di tevahiya rêwîtiya wan de, çaxê ewr ji ser kon radibû Îsraîlî jî koç dikirin.

³⁷Lê heger ewr ranebûya, heta roja ewr radibû koç nedikirin.

³⁸Çimkî di tevahiya rêwîtiya wan de, bi roj li ser konan ewrê Xudan, bi şev jî agir rê nîşanî tevahiya Mala Îsraîl dida.