Read Kurmanji Încîl Derketin 5 Bible Online

Derketin 5 - Kurmanji Încîl bible

Derketin 5

¹Piştre Mûsa û Harûn çûn ba Firewn û jê re gotin: «Xwedayê Îsraîl Xudan dibêje: ‹Gelê min berde. Bila li beriyê ji min re cejnê bike.›»

²Firewn got: «Ma Xudan kî ye ku ez guhdariya dengê wî bikim û Îsraîliyan berdim? Ez Xudan nas nakim. Îsraîliyan jî bernadim.»

³Wan got: «Xwedayê Îbraniyan li me xuya bû. Em ji te lava dikin, bihêle sê rojan em di beriyê re herin û ji Xwedayê xwe Xudan re qurbanan serjê bikin. Naxwe wê me bi şûr an jî bi kulê ceza bike.»

⁴Lê Padîşahê Misrê ji wan re got: «Mûsa û Harûn, hûn çima xelkê ji karên wan dikin? Hûn jî herin ser karê xwe!»

⁵Piştre Firewn wiha got: «Binêrin, niha ew ji Misriyan zêdetir in û hûn wan ji karên wan dikin!»

⁶Firewn hema wê rojê emir da serkarên suxrê û karmendên gel û got:

⁷«Ji bo çêkirina kelpîçan, êdî hûnê kayê nedin gel. Bila ew bi xwe herin û kayê bicivînin.

⁸Lê ji wan bixwazin ku bi qasî berê kelpîçan çêkin, hejmara kelpîçan kêm nekin. Çimkî ew tiral in. Loma diqîrin û dibêjin: ‹Em herin û ji Xwedayê xwe re qurban serjê bikin.›

⁹Barên wan girantir bikin. Hê bêtir bixebitin û guh nedin peyvên derew.»

¹⁰Serkarên suxrê û karmendên gel derketin û ji gel re gotin: «Firewn wiha dibêje: ‹Ezê kayê nedim we.

¹¹Rabin herin, we ka li ku peyda kir, ji xwe re bînin. Lê wê karê we neyê kêmkirin.›»

¹²Bi vî awayî gel, ji bo ku di şûna kayê de pûş bide hev li seranserê welatê Misrê belav bû.

¹³Serkarên suxrê zorê li wan dikirin û digotin: «Wekî rojên ku ka hebû, karên xwe bêkêmahî pêk bînin.»

¹⁴Li karmendên Îsraîlî xistin ku serkarên suxrê yên Firewn ew danîbûn ser wan û ji wan re gotin: «We çima duh û îro, wekî berê kelpîçên ji we dihatin xwestin çênekirin?»

¹⁵Karmendên Îsraîlî çûn ba Firewn, qîriyan û gotin: «Tu çima li xulamên xwe wiha dikî?

¹⁶Kayê nadin me û ji me re dibêjin: ‹Kelpîçan çêkin!› Va ye li xulamên te dixin, lê yê sûcdar gelê te ye.»

¹⁷Firewn got: «Hûn tiral in, tiral! Loma hûn dibêjin: ‹Em herin, ji Xudan re qurban serjê bikin.›

¹⁸Niha herin û bixebitin. Wê kayê jî nedin we, lê divê hûn hejmara kelpîçan kêm nekin.»

¹⁹Gava ji karmendên Îsraîlî re hat gotin ku «Hûnê ji hejmara kelpîçan û karê xwe yê rojane tiştekî kêm nekin», wan fêm kir ku ew di rewşeke zor de ne.

²⁰Çaxê ew ji ba Firewn rabûn, rastî Mûsa û Harûn hatin ku li benda wan sekinîbûn.

²¹Ji wan re gotin: «Bila Xudan ya ku we kir bibîne û ji we re nehêle. We em di çavê Firewn û peywirdarên wî de rezîl kirin. Ji bo ku me bikujin, we şûrek da destê wan.»

²²Mûsa li Xudan zivirî û got: «Ya Reb, te çima xerabî bi vî gelî kir? Te çima ez şandim?

²³Ji roja ku ez li ser navê te çûm ku bi Firewn re bipeyivim heta niha, ew xerabiyê bi vî gelî dike û ji bo ku tu gelê xwe rizgar bikî, te tiştek nekir.»