Read Kurmanji Încîl Derketin 6 Bible Online

Derketin 6 - Kurmanji Încîl bible

Derketin 6

¹Xudan ji Mûsa re got: «Tê bibînî niha ezê çi bi Firewn bikim. Wê ji ber destê min ê hêzdar gelê Îsraîl berde û ji ber destê min ê hêzdar wan ji welatê xwe biqewirîne.»

²Xwedê careke din ji Mûsa re got: «Ez Yahwe[5] me.

³Ez wekî Xwedayê Karîndar li Îbrahîm, Îshaq û Aqûb xuya bûm, lê min xwe bi navê Yahwe bi wan neda naskirin.

⁴Min bi wan re peymanekê çêkir ku ez welatê Kenanê bidim wan ku lê bi xerîbî diman.

⁵Min nalîna Îsraîliyên koleyên Misriyan bihîst û peymana xwe bi bîr anî.

⁶«Loma ji gelê Îsraîl re bêje: ‹Ez Xudan im. Ezê we ji bin barê Misriyan derînim û we ji koletiya wan azad bikim. Ezê bi zendê xwe yê dirêjkirî wan bi giranî ceza bikim û we rizgar[6] bikim.

⁷Ezê we bikim gelê xwe û bibim Xwedayê we. Hûnê bizanibin ku ez Xwedayê we Xudan im û min hûn ji bin barê Misriyan deranî.

⁸Ezê we bibim wî welatê ku min soz dabû bidim Îbrahîm, Îshaq û Aqûb. Ezê wê derê bikim milkê we. Ez Xudan im.›»

⁹Mûsa ev ji gelê Îsraîl re got, lê ji ber ku hêviyên wan şikestibûn û di bin koletiyeke giran de bûn guh nedanê.

¹⁰Xudan ji Mûsa re got:

¹¹«Here, ji Firewn re bêje bila ji welatê xwe Îsraîliyan berde.»

¹²Lê Mûsa ji Xudan re got: «Îsraîlî guhdariya min nakin, wê Firewn çawa guhdariya min bike? Ji xwe ez mirovekî bêzar û ziman im!»

¹³Xudan li ser gelê Îsraîl û Firewn bi Mûsa û Harûn re peyivî û li wan emir kir ku wan ji welatê Misrê derîne.

¹⁴Serekên malbatên Îsraîliyan ev bûn: Kurên Rûbênê ku kurê pêşî yê Îsraîl bû: Henox, Pallû, Hesron û Karmî. Ev ji binemala Rûbên in.

¹⁵Kurên Şimûn: Yemûêl, Yamîn, Ohad, Yaxîn, Sohar û kurê jineke Kenanî Şawûl. Ev ji binemala Şimûn in.

¹⁶Li gorî qeydên ziriyeta wan, kurên Lêwî ev in: Gêrşon, Qohat û Mêrarî. Lêwî 137 sal kir.

¹⁷Kurên Gêrşon, li gorî binemalên xwe ev in: Lîvnî û Şîmî.

¹⁸Kurên Qohat: Emram, Yîshar, Hevron û Ûzziyêl. Qohat 133 sal kir.

¹⁹Kurên Mêrarî: Mahlî û Mûşî. Li gorî qeydên ziriyetên wan, binemalên Lêwî ev bûn.

²⁰Emram bi meta xwe Yoxeved re zewicî û Yoxevedê jê re Harûn û Mûsa anî. Emram 137 sal kir.

²¹Kurên Yîshar: Qorax, Nefeg û Zikrî.

²²Kurên Ûzziyêl: Mîşaêl, Êlsafan û Sîtrî.

²³Harûn xwişka Nahşon, Êlîşevaya keça Emmînadav ji xwe re anî. Ji Êlîşevayê jê re Nadav, Avîhû, Êlazar û Îtamar çêbûn.

²⁴Kurên Qorax: Assîr, Êlqana û Avyasaf. Binemalên Qoraxî ev in.

²⁵Kurê Harûn Êlazar, ji keçên Pûtiyêlê yek ji xwe re anî û ji wê Pînehas çêbû. Li gorî binemalên xwe serekên malbatên Lêwî ev in.

²⁶Mûsa û Harûnê ku Xudan ji wan re got: «Gelê Îsraîl ref bi ref ji welatê Misrê derînin» ev bûn.

²⁷Kesên ku ji bo gelê Îsraîl ji Misrê derînin, bi Firewn re peyivîn Mûsa û Harûn in.

²⁸Roja Xudan li welatê Misrê bi Mûsa re peyivî,

²⁹wî jê re got: «Ez Xudan im. Her tiştê min ji te re got, ji Firewn re bibêje.»

³⁰Lê Mûsa li hizûra Xudan wiha got: «Ji xwe ez mirovekî bêzar û ziman im, wê Firewn çawa guh bide min?»