Read Kurmanji Încîl Derketin 7 Bible Online

Derketin 7 - Kurmanji Încîl bible

Derketin 7

¹Xudan ji Mûsa re got: «Va ye ez te ji Firewn re dikim wekî Xwedê û wê birayê te Harûn bibe pêxemberê te.

²Her tiştê ku min ji te re got, ji birayê xwe Harûn re bibêje. Bila Harûn ji Firewn bixwaze ku ew Îsraîliyan ji welatê xwe berde.

³Lê ezê dilê Firewn hişk bikim û nîşan û kerametên xwe li welatê Misrê zêde bikim.

⁴Gava Firewn guhdariya we neke, ezê destê xwe deynim ser Misrê û bi giranî ceza bikim. Ezê gelê xwe yê Îsraîlî ref bi ref, ji welatê Misrê derxim.

⁵Gava min destê xwe dirêjî Misrê kir û gelê Îsraîl ji nav wan deranî, wê Misrî bizanibin ku Xudan ez im.»

⁶Çawa ku Xudan li wan emir kiribû, Mûsa û Harûn wiha kir.

⁷Gava bi Firewn re axivîn, Mûsa heştê, Harûn jî heştê û sê salî bû.

⁸Xudan ji Mûsa û Harûn re got:

⁹«Gava Firewn ji we re bêje: ‹Kerametekê çêkin›, ji Harûn re bêje: ‹Gopalê xwe hilde û bavêje ber Firewn. Wê bibe mar.›»

¹⁰Bi vî awayî Mûsa û Harûn çûn ba Firewn û wekî ku Xudan emir kiribû, wisa kirin. Harûn gopalê xwe avêt ber Firewn û karmendên wî. Gopal jî bû mar.

¹¹Firewn gazî aqilmend û sêrbazên xwe kir. Sêrbazên Misrê jî bi sêra xwe wisa kirin.

¹²Her yekî gopalê xwe avêt û gopalên wan bûn mar. Lê gopalê Harûn, gopalên wan daqurtandin.

¹³Çawa ku Xudan gotibû, dilê Firewn hişk bû û guhdariya wan nekir.

¹⁴Xudan ji Mûsa re got: «Dilê Firewn hişk e, ew naxwaze gel berde.

¹⁵Serê sibê here ba Firewn. Gava ew diçe Nîlê, tu li keviya çem li benda wî bisekine. Gopalê bû mar jî bila di destê te de be.

¹⁶Jê re bêje: ‹Xudan, Xwedayê Îbraniyan ez şandim ku ji te re bêjim gelê min berde ku li beriyê xulamiya min bikin. Lê heta niha te guhdarî nekir.

¹⁷Xudan dibêje: Tê bi vê yekê bizanibî ku ez Xudan im. Ezê gopalê destê xwe li ava Nîlê bixim û wê bibe xwîn.

¹⁸Wê masî bimirin û bêhn bikeve çem. Wê Misrî nikaribin ava çêm vexwin.›»

¹⁹Xudan ji Mûsa re got: «Ji Harûn re bêje: ‹Gopalê xwe hilde û destê xwe dirêjî ser avên Misrê — çem û qamirgehên wî, cihok û hemû çalên wan ên avê — bike ku bibin xwîn. Wê li seranserê welatê Misrê, hemû avên di firaxên dar û keviran de bibin xwîn.›»

²⁰Mûsa û Harûn li gorî emrê Xudan kirin. Harûn li ber çavê Firewn û karmendên wî gopalê xwe rakir û li ava çêm xist. Tevahiya çem bû xwîn

²¹û hemû masiyên di çêm de mirin. Bêhn kete çem û Misriyan nikaribûn ji ava çêm vexwin. Li seranserê welatê Misrê xwîn hebû.

²²Sêrbazên Misrê jî bi sêra xwe heman tiştî kirin. Çawa ku Xudan gotibû, dilê Firewn hişk bû û guhdariya wan nekir.

²³Firewn ji xwe re nekir xem û berê xwe da qesra xwe.

²⁴Misriyan li kêleka çêm dest bi kolanê kir. Çimkî nikaribûn ji ava çêm vexwin.

²⁵Heft roj di ser lêxistina Xudan a çêm re derbas bû.