Read Kurmanji Încîl Zebûr 10 Bible Online

Zebûr 10 - Kurmanji Încîl bible

Zebûr 10

¹Ya Xudan, tu çima wisa dimînî li dûrî, Di demên teng de xwe vedişêrî?

²Bi quretiya xerab dişewite bindest, Bila bikeve xefika xwe, ew yê serdest.

³Zilamê xerab, bi ya ku canê wî dikişîne dibe pesindar, Yê çavbirçî, red dike Xudan, biçûk dibîne Afirandar.

⁴Bi pozbilindiya xwe, yê xerab nagere li Xudan, Hergav dibê, «Xwedê tune,» ev e ya wî, hemû raman.

⁵Fireh e riya xeraban, Hukmên te ji nêrîna wan pirr bilindtir e, Yê xerab fêm nake, li ba wî ne berz û ne çêtir e.

⁶Di dilê xwe de dibêje, «Ez nahejim, Tu car ber bi felaketê ve nabezim.»

⁷Devê wî bi lanet, hîle û xedariyê tije ye, Fesadî û xerabî di bin zimanê wî de heye.

⁸Li dora gundan kozik datîne, Li derên xewle canê bêriyan hiltîne, Bi dizî çavê xwe, li ser yê bêçare digerîne.

⁹Wek şêrê di şikeftê de, Li dera xalî kozik datîne, Ji bo girtina bindest dimîne. Ku girt, tora xwe kaş dike û hiltîne.

¹⁰Ditewin, dikevin ser qerefîskan, Neçar dikevin nav pençan.

¹¹Di dilê xwe de dibêjin, «Ji bîr kir Xwedê, Nixamt rûyê xwe, hew dibîne vê.»

¹²Rabe ya Xwedê, destê xwe bilind ke ya Xudan! Tu ji bîr neke bindestan!

¹³Çima yê xerab biçûk dibîne Xwedê, Di dilê xwe de, «Ew hesab napirse» dibê?

¹⁴Belê tu dibînî, ji bo bi destê xwe cezakirinê, Li kîn û xerabiyê dimeyzînî, Tu yî spartgeha neçaran, Tu yî alîkarê sêwiyan.

¹⁵Bişkîne milê xerab û neheq, Bipirse li hesabê nepirsî yê bêheq.

¹⁶Padîşah e, her û her Xudan, Namîne li diyarê wî tu tişt ji miletan.

¹⁷Ji bo dayina heqê bêkes û neçaran, Ya Xudan, te bihîst bangkirina hejaran.

¹⁸Tê dilê wan xurt bikî, gohê xwe li wan vebikî, Da ku zilamê ji axê, nebe sedemê tirsê.