Read Kurmanji Încîl Zebûr 103 Bible Online

Zebûr 103 - Kurmanji Încîl bible

Zebûr 103

¹Zebûra Dawid Ey canê min, Xudan pîroz ke! Pesnê navê wî yê pîroz bide, ey hemû hebûna min!

²Ey canê min, Xudan pîroz ke! Û jibîr neke, hemû qenciyên wî!

³Yê ku hemû sûcên te dibexşîne, Yê ku ji hemû nexweşînên te re şîfayê tîne,

⁴Yê ku canê te ji gorê dertîne, Yê ku taca kerem û dilovaniyê li te dike,

⁵Ew e, yê ku hemû jiyana te, bi qenciyê têr dike, Da ku xortaniya te, wek eyloyekî nû bibe.

⁶Xudan ji hemû bindestan re, Dilsoz û dadperwer e.

⁷Wî riyên xwe bi Mûsa, Karên xwe bi kurên Îsraêlê da zanîn.

⁸Xudan dilovan û keremdar e, Zû hêrs nabe, hezkirina wî zêde ye.

⁹Ew hergav sûcdar nake, Hêrsa wî her û her najo.

¹⁰Ew li gor sûcên me bi me re nade û nastîne, Li gor sûcdariya me heyfê ji me hilnayne.

¹¹Çimkî ezman ji erdê çiqas bilindtir be, Heskirina wî ya ji yên ku ji wî ditirsin re ewqas mezin e.

¹²Rojhilat ji rojava çiqas dûr be, Wî gunehên me ewqas ji me dûr kir.

¹³Bav, çawa ber zarokên xwe dikeve, Xudan jî ewqas, ber yên ku jê ditirsin dikeve.

¹⁴Çimkî ew bi afirandina me dizane, Ew bibîr tîne ku em ax in.

¹⁵Herçî mirov e, rojên wî wek giya ne, Wek kulîlkên çolê geş dibe;

¹⁶Ba di ser re derbas dibe, tune dibe, Êdî ciyê wî, wî nas nake.

¹⁷Belê kerema Xudan, her û her li ser wan e ku jê ditirsin, Dilsoziya wî, li ser zarokên zarokên wan e,

¹⁸Li ser wan e, Ew yên ku peymana wî digirin û emrên wî bibîr tînin.

¹⁹Xudan, textê xwe li ezmanan daniye, Serweriya wî li ser hemû kesî ye.

²⁰Ey hûn milyaketên wî, Xudan pîroz kin! Ey egîtên ku bi ya wî dikin, Wî gohdar bikin!

²¹Ey hûn, hemû hêzên ezmanî, Evdên wî yên ku daxwaza wî tînin cih, Xudan pîroz kin!

²²Ey hemû karên di bin serweriya wî de, Xudan pîroz kin! Ey canê min, Xudan pîroz bike!