Read Kurmanji Încîl Zebûr 116 Bible Online

Zebûr 116 - Kurmanji Încîl bible

Zebûr 116

¹Ez ji Xudan hez dikim, Çimkî ew dengê min û hawara min dibihîze.

²Ji ber ku wî gohê xwe da min, Heta ku ez bijîm, ezê bangî wî bikim.

³Benên mirinê hawirdora min girtin, Û tengahiyên diyarê mirinê ez pêçam, Derd û tengahiyê ez girtim.

⁴Hingê min bangî navê Xudan kir, «Eman, ya Xudan tu canê min azad ke!»

⁵Xudan keremdar û dadperwer e, Xwedayê me dilovan e.

⁶Xudan mirovên sexik diparêze, Gava ez ketim, wî ez rakirim.

⁷Ey canê min, li rihetiya xwe vegere, Çimkî Xudan qencî bi te kir.

⁸Te canê min ji mirinê, Çavên min ji hêsiran, Lingên min ji terpilînê rizgar kir.

⁹Ezê li diyarê jiyandaran, Li pêş Xudan rêve herim.

¹⁰Dema ku min digot, «Ez tengahiya mezin dikişînim» jî, Min baweriya xwe parast.

¹¹Min di şaşbûna xwe de got, «Hemû mirov derewkar in.»

¹²Ji bo hemû qenciyên ku bi min kir, Ma ez çi bidim Xudan?

¹³Ezê kasa rizgariyê hilînim, Û navê Xudan bang bikim.

¹⁴Li pêşberî hemû gelê xwe, Ji Xudan re, bicih bînim sozên xwe.

¹⁵Di çavên Xudan de, Mirina dilsozên wî hêja ye.

¹⁶Ya Xudan, ez evdê te yê rastîn im; Lawê qewraşa te me, Te zincîrên min vekir.

¹⁷Ezê goriya spaskirinê pêşkişî te bikim. Ya Xudan, ezê bangî navê te kim.

¹⁸Ezê nedrên ku min ji Xudan re soz dane bînim cih, Li pêşber hemû gelê wî,

¹⁹Li hewşa mala Xudan, Li nav te, ey Orşelîm! Pesnê Xudan bidin!