Read Kurmanji Încîl Zebûr 135 Bible Online

Zebûr 135 - Kurmanji Încîl bible

Zebûr 135

¹Pesnê Xudan bidin! Pesnê navê Xudan bidin, Ey evdên Xudan, pesnê Xudan bidin.

²Ey hûn yên li mala Xudan, Li hewşa mala Xwedê xizmet dikin, Pesin bidin!

³Pesnê Xudan bidin, Çimkî Xudan qenc e. Ji navê wî re bistirin, Çimkî şîrîn e.

⁴Xudan ji bo xwe Aqûb bijart, Îsraêlê jî wek milkê xwe.

⁵Ez dizanim, Xudan mezin e, Rebê me di ser hemû îlahan de ye.

⁶Li erdê û li ezman, Li derya û hemû kûrahiyan, Xudan her daxwaza xwe bi cih tîne.

⁷Ew ji çaraliyên erdê ewran bilind dike, Ji bo baranê birûskan çêdike, Ji embarên xwe bayê radike.

⁸Wî ji mirov heta heywanan, Hemû nuxwiriyên Misirê kuştin.

⁹Li nav te, ey Misir! Wî ji Fîrewn û hemû wezîfedarên wî re, Nîşan û karên nedîtî şand.

¹⁰Wî li gellek miletan xist, Padîşahên hêzdar kuştin.

¹¹Wî padîşahê Amoriyan Sîhon, Padîşahê Başanê Og, Û hemû padîşahiyên Kenanê kuşt.

¹²Wî ciyê wan wek mîras, Bi mîrasî da gelê xwe Îsraêl.

¹³Ya Xudan, navê te her û her dimîne, Ya Xudan, bîranîna te, her û her didomîne.

¹⁴Wê Xudan gelê xwe biparêze, Û dilovaniyê li evdên xwe bike.

¹⁵Pûtên miletan ji zîv û zêr in, Karên destê mirov in.

¹⁶Devê wan heye, napeyivin, Çavên wan hene, nabînin,

¹⁷Gohên wan hene, nabihîzin, Di devê wan de, hilm nîne.

¹⁸Yên ku wan çêdikin û yên ku xwe dispêrin wan, Ew jî wê bibin mîna wan!

¹⁹Ey mala Îsraêl, pesnê Xudan bidin! Ey mala Harûn, pesnê Xudan bidin!

²⁰Ey mala Levî, pesnê Xudan bidin! Ey yên ku ji Xudan ditirsin, pesnê Xudan bidin.

²¹Xudanê ku li Orşelîmê rûdinê, Bila ji Sîyonê bê pesindan! Pesnê Xudan bidin!