Read Kurmanji Încîl Zebûr 139 Bible Online

Zebûr 139 - Kurmanji Încîl bible

Zebûr 139

¹Ji bo şefê muzîkê Zebûra Dawid Ya Xudan, te ez sihêtî kirim û bi min zanî.

²Tu bi rabûn û rûniştina min dizanî, Ji dûrî ve fêm dikî fikrên min.

³Tu li riya ku ez diçimê û dera ku lê dimînim dinêrî, Tu bi hemû riyên min baş dizanî.

⁴Hê ku peyv nehatiye ser zarê min, Tu wê bi tevahî dizanî, ya Xudan.

⁵Ji pêş û paş ve, te dor li min girtiye, Û destê xwe daniye ser min.

⁶Ev zanîn ji bo min pirr ecêb e, Kûr e, ez nagihîjimê.

⁷Ez dikarim herim kuderê ji ber ruhê te, Birevim kuderê ji ber te?

⁸Eger ez derkevim ezman, tu li wê derê yî, Nivîna xwe raxim li diyarê miriyan, tu li wê derê yî.

⁹Eger ez bazkên seherê li xwe kim, Û li dawiya deryayê deynim,

¹⁰Li wê derê jî destê te rêberiya min dike, Û destê te yê rastê bi min digire.

¹¹Eger ez bêjim, «Wê tariya rastîn min rapêçe, Ronahiya li dora min bibe şev,»

¹²Tarî jî ji bo te ne tarî ye, Şev, wek rojê dibiriqe, Tarî û ronahî ji bo te yek e.

¹³Hundirê min te afirand, Di malzaroka dê de, te ez honandim.

¹⁴Ez pesnê te didim, Çimkî ez bi heybet û şehaneyî hatime afirandin. Karên te ecêb in! Ez baş pê dizanim.

¹⁵Gava ez li dera veşartî hatim afirandin, Di kûrahiyên erdê de hatim nixamtin, Bedena min ji te veşartî nebû.

¹⁶Hê di malzaroka dê de çavên te ez dîtim; Hemû rojên ku ji bo min hatibûn veqetandin, Beriya ku yek ji wan jî bê, Tev di kitêba te de hatibûn nivîsandin.

¹⁷Fikrên te yên ji bo min, çiqas bi rûmet in, ey Xwedê, Tevahiya wan, çiqas pirr in!

¹⁸Eger ez wan bijmêrim, ji sêlakê zêdetir in. Ez hişyar dibim, hê ez bi te re me.

¹⁹Xwezî te xeraban nehêşta, ey Xwedê! Ey zilamên destbixwîn, dûr bin ji min!

²⁰Çimkî ew li hember te bi xerabî dipeyivin, Û dijminên te, bi derewkarî navê te hil didin.

²¹Ya Xudan, ma ez ji wan nefret nekim, ku nefret dikin ji te? Ma wê çawa bîzê min, ji yên ku serî li ber te radikin neçe?

²²Ez bi tevahî ji wan nefret dikim, Ew ji bo min bûne dijmin.

²³Ey Xwedê, min sihêtî bike, dilê min binase, Min bitoklîne, bi fikrên min bizane.

²⁴Binêre, eger xerabiyek hebe, Di riya herheyî de, tu ji min re bibe rêber!