Read Kurmanji Încîl Zebûr 145 Bible Online

Zebûr 145 - Kurmanji Încîl bible

Zebûr 145

¹Lavija Dawid a pesindanê Ey Xwedayê min, ey padîşah, ezê te berz bikim, Ezê ji navê te re her û her spas bikim.

²Ezê her roj pesnê te bidim, Ezê her û her pesnê navê te bidim.

³Xudan mezin e û hêjayî pesindanê ye, Aqil nagihîje mezinahiya wî.

⁴Kirinên te ji nifşekî derbasî yê din dibin, Karên te yên hêzdar wê bên ragihandin.

⁵Wê mirov, karên te yên mezin, berz û rewnaq bipeyivin, Ezê li ser karên te yên ecêb bifikirim.

⁶Wê li ser hêzdariya karên te yên bi haşmet bifikirin, Ez jî, ezê mezinbûna te bidim bihîstin.

⁷Ewê bîranîna qenciya te ya mezin bidin bihîstin, Bi lavijan pesnê rastdariya te bidin.

⁸Xudan keremdar û dilovan e, Zû hêrs nabe, kerema wî mezin e.

⁹Xudan, ji bo her kesî qenc e, Dilovaniya wî, di ser hemû karên wî re ye.

¹⁰Hemû karên te, ji te re spasdar in, ya Xudan, Hemû dilsozên te, didin pesnê te.

¹¹Li ser berziya padîşahiya te tê peyivîn, Hêzdariya te tê axaftin.

¹²Da ku herkes bi karên te yên hêzdar, Haşmet û berziya padîşahiya te bizanibe.

¹³Padîşahiya te padîşahiya her û her e, Herdem dajo serweriya te. Xudan, di hemû sozên xwe de dilsoz e, Di her karên xwe de dilovan e.

¹⁴Xudan ji her kesê ketî re dibe destek, Hemû yên xwarbûyî rast dike.

¹⁵Çavê her kesî li te ye, Tu xwarina wan, di wextê de didî wan.

¹⁶Tu destên xwe vedikî, Daxwaza her jiyandarî bi cih tînî.

¹⁷Xudan di hemû riyên xwe de dadperwer e, Di hemû karên xwe de keremdar e.

¹⁸Xudan nêzikî wan hemûyan e, ku bang dikinê, Ew yên ku, ji dil bang dikinê.

¹⁹Ew, daxwaza yên ku jê ditirsin tîne cih, Feryada wan dibihîze û wan rizgar dike.

²⁰Xudan, hemû yên ku jê hez dikin diparêze, Û hemû xeraban tune dike.

²¹Devê min, pesnê Xudan dide! Bila her û her hemû jiyandar, Pesnê navê wî yê pîroz bidin.