Read Kurmanji Încîl Zebûr 17 Bible Online

Zebûr 17 - Kurmanji Încîl bible

Zebûr 17

¹Duayek Dawid Ya Xudan, li doza heq gohdarî bike, Feryada min bibihîze! Goh bide dua min a ji lêvên bêhîle!

²Tu min mafdar derîne, Çimkî çavê te rastiyê dibîne.

³Te ceriband dilê min, Bi şev ez sehitandim, Bi îmtihankirina min, Te xerabiyek nedît; Min niyet kir, ya xerab dernakeve ji devê min.

⁴Herçî kirinên kesên din in, Bi gohdana gotina te, Ji riyên zordariyê reviyam.

⁵Min bi gavên şidayî da ser riya te, Neşemitîn lingên min.

⁶Min bangî te kir ey Xwedê, Çimkî tu bersîv didî min; Goh bide, gohdar be li gotina min!

⁷Ey tu, yên ku xwe dispêrinê, Bi destê xwe yê rastê, wan ji dijminên wan xelas dike! Kerema xwe ya mezin nîşan de.

⁸Min biparêze wek bîbikê çavan; Ji êrîşkirina xeraban,

⁹Ji dijminên ku dora min rapêçane, Di bin siya bazkên xwe de min veşêre.

¹⁰Dilê wan dohn girtiye, Bi devê xwe bi quretî dibêjin.

¹¹Niha dor li me dipêçin, li pey şopa me ne, Ji bo me li erdê xin çav li ser me ne.

¹²Wek şêrekî li benda perçekirinê, Wek şêrekî ciwan ê ku rûniştiye di kemînê.

¹³Rabe ya Xudan, pêşî li wan bigre, wan hilweşîne! Canê min bi şûrê xwe ji xeraban, Bi destê xwe ji mirovan, ya Xudan, Ji zilamên dinê bifilitîne.

¹⁴Yên ku para wan a jînê ji vê dinê ye, Bila zikê wan bi cezayê ku tê bidî tije bimîne, Bila zarokên wan jî bixwin û têr bibin, Yê mayî ji nevîyên wan re bimîne.

¹⁵Ezê bi saya rastdariyê rûyê te bibînim, Gava hişyar bim, bi dîdara te têr bibim.