Read Kurmanji Încîl Zebûr 30 Bible Online

Zebûr 30 - Kurmanji Încîl bible

Zebûr 30

¹Lavijek ku di dema pêşkişkirina perestgehê tê gotin Zebûra Dawid Ez te bilind dikim ya Xudan, Çimkî te ez xelas kirim, Te dijminên min bi min neda şakirin.

²Ya Xudan Xwedayê min, Min li te kir hawar, te şîfa da min.

³Ya Xudan, te canê min derxist ji diyarê miriyan, Da ku ez nekevim gorê te da min jiyan.

⁴Ey hûn dilsozên Xudan, pesnê wî bidin bi îlahiyan, Ji bîranîna navê wî yê pîroz re şikir bikin.

⁵Çimkî ji bo gavakê ye hêrsa wî, Her û her e kerema wî; Belkî bi şev girîn e, Belê serê sibê şên û şahî ne.

⁶Min di firehiyê de got, «Ezê tu caran nehejim!»

⁷Bi kerema xwe ya Xudan, Te ez bêleq kirim wek çiyan; Gava te rûyê xwe nixamt, Ez ketim tirs û sawan.

⁸Ya Xudan ez gazî te dikim, Ji te dikim lava:

⁹«Eger dakevim gorê, Bi kêrî çi tê xwîna min? Ma ax ji bo te dibe spasdar, Ji bo dilisoziya te dibe agahkar?

¹⁰Bibihîze ya Xudan, li min were rehmê; Ya Xudan ji min re bibe alîkar!»

¹¹Te şîna min ji bo min kir dîlan, Şêla min deranî, ez bi şahî rapêçam.

¹²Da ku, dilê min bi îlahiyan pesnê te bide, nesekine! Ya Xudan Xwedayê min, ezê her û her ji te re bibim spasdar.