Read Kurmanji Încîl Zebûr 33 Bible Online

Zebûr 33 - Kurmanji Încîl bible

Zebûr 33

¹Ey rastno, bi Xudan şa bin! Şikirkirin bi rastan dikeve.

²Çengê lêxin spasî bidin Xudan, Bi santûra deh têl jê re bêjin îlahiyan.

³Ji wî re îlahiyek nû bêjin, Bi dengekî bilind û xweş bêjin.

⁴Çimkî ripîrast e gotina Xudan, Bi dilsozî dike ew her karan.

⁵Ji rastî û edaletê hez dike, Heskirina wî dinê tije dike.

⁶Ezman bi peyva Xudan, Roj û heyv û stêr, bi hilma wî hatin afiran.

⁷Ew avên deryayê li hev dicivîne, Avên kûr di sarincan de bi ser hev tîne.

⁸Bila bitirse hemû erd ji Xudan, Hurmetê jê re nîşan bide herkesê li tevahiya cîhan.

⁹Çimkî wî got û her tişt çêbû; Wî ferman kir her tişt xuya bû.

¹⁰Xudan xera dike şêwra miletan, Vala dertîne fikrên gelan.

¹¹Şêwra Xudan her û her e, Fikra dilê wî, di dema tu nifşî de naguhere.

¹²Xwezî bi wî miletî ku Xwedayê wî Xudan e, Ew gel ku wî wek mîras hilane!

¹³Ji ezmanan dinihêre Xudan, Ew dibîne hemû mirovan.

¹⁴Ji dera runiştî, Dinihêre li hemû yên li ser erdê rûniştî.

¹⁵Ew e yê ku dilê her kesî afirand, Ew fêm dike hemû karên mirovan.

¹⁶Padîşahê ku bi pirrbûna leşkerên xwe xelas dibe tune, Mêrxasê ku bi pirrbûna hêza xwe xelas bûne li kune?

¹⁷Ji bo xelasiyê hesp tiştek vala ye, Bi hêza xwe ya mezin ne xelasiya tu kesa ye.

¹⁸Belê çavê Xudan li ser wan e ku ji wî ditirsin, Li ser wan e ku hêviya xwe bi kerema wî ve girê didin;

¹⁹Heta ku, ew xelas dike canê wan ji mirinê, Wan dide jiyîn dema xela û tunebûnê.

²⁰Li benda Xudan e canê me, Ew e alîkar û mertalê me.

²¹Çimkî bi wî şa ye dilê me, Bi navê wî yê pîroz e ewlehiya me.

²²Me hêviya xwe bi te ve girêda ye, ya Xudan, Bila kerema te be li ser me hemûyan!