Read Kurmanji Încîl Zebûr 45 Bible Online

Zebûr 45 - Kurmanji Încîl bible

Zebûr 45

¹Ji bo şefê muzîkê Di meqamê Sosinê de Maskîla kurên Korah e, lavija evînî Ji dilê min gotinên xweş difûrin, Ji bo padîşah ez dibêjim helbestan, Zimanê min wek qelema nivîskarek hosta.

²Tu herî xweşikê mirovan î, Kerem belav bûye li ser lêvên te seranser. Ji bo vê Xwedê te, pîroz kiriye her û her.

³Ey şervanê mêrxas, tu bi rewnakî û berziya xwe, Şûrê xwe, li navtenga xwe bipêçe.

⁴Di riya rastî û dadperweriyê de, Bi berziya xwe li serketinê siwar be, Bila destê te yê rastê, karên tirsdar hîn bikin.

⁵Tîrên te tûj in, Ew di dilê dijminên padîşah de ne, Milet di bin lingê te de ne.

⁶Textê ji Xwedê ye, hergav û her û her e, Gopalê padîşahiya te gopalê rastiyê ye.

⁷Tu hez dikî ji rastiyê, nefret dikî ji xerabiyê. Ji ber vê yekê Xwedê, Xwedayê te, Te bi donê şahiyê, Ji hevalên te bêtir don kir.

⁸Bîhna mûr, ud û darçinê ji kincên te tê; Li qesrên ji diranên fîl, tembûr te şa dikin!

⁹Keçên padîşahan di nav jinên te yên bi rûmet de, Şahbanû, di nav zêrê Ofîr de li milê te yê rastê.

¹⁰Gohdar be ey keçê, binêre, goh bide, Gelê xwe, mala bavê xwe jî jibîr bike.

¹¹Û padîşah, wê rindiya te bixwaze, Ew e mîrê te, li pêş wî bitewe.

¹²Ey keça Sûrê, Wê dewlemendên welat diyariyan bînin, da ku kerema te bistînin.

¹³Keça padîşah di hundir de, bi berzî û biriqandin, Lîbasê wê bi zêran hatiye honandin.

¹⁴Wê bi kincên nexişandî dertînin ba padîşah, Li pey wê keç û hevalên wê yên keçîn tên.

¹⁵Ewê wê bibin bi kêf û bi şahî, Da ku têkevin qesra padîşahî.

¹⁶Wê kurên te, ey padîşah, wê bistînin cihê bav û kalên te, Tê wan bikî serok li tevahiya welat.

¹⁷Ji nifşan heta nifşan, ezê navê te bidim bihîstin, Di nav miletan de her û her pesnê te bê dayin.