Read Kurmanji Încîl Zebûr 5 Bible Online

Zebûr 5 - Kurmanji Încîl bible

Zebûr 5

¹Ji bo şefê muzîkê Bi bilûrê, Zebûra Dawid Goh bide gotinên min, ya Xudan, Axînên min bibihîze.

²Feryada min bibihîze, ey Padîşah û Xwedayê min! Çimkî, ji te re ye dua min.

³Serê sibê tu dibîhîzî dengê min, ya Xudan, Her sibe ji te re dua dikim, bi hêvî li benda te dimînim.

⁴Çimkî tu ne ew Xweda yî ku ji xerabiyê hez dike, Xerabî li ba te cih nake.

⁵Pozbilind li pêş te cih nabînin, Hemû gunehkar nefreta te dibînin,

⁶Tu derewkaran dikî tune, Ji zilamê xwîndar û hîlekar, Ya Xudan, tu çiqas aciz î, hawar!

⁷Belê ezê, bi wê kerema te ya mezin, Di hundirê mala te kevim, Bi tirs serî li ber perestgeha te ya pîroz deynim.

⁸Ya Xudan, ji ber dijminên min, Di rastdariya xwe de rê nîşanî min bide, Riya xwe rast bike li ber min.

⁹Çimkî rastî ji devê wan dernakeve, Tije xerabî ye dilê wan, Gora vekirî ye gewriya wan, Tenê xwe xweşkirin e ya wan.

¹⁰Ya Xwedê, wan sûcdar derîne! Bike ku planên wan hilweşin. Berî wan de, ji ber serhildanên wan ên bêhejmar, Çimkî ew li hember te bûn serhildar.

¹¹Her kesê ku xwe davêje te bila şa be, Bila herdem şa û dilgeş be. Çimkî tu diparêzî wan. Hezkiriyên navê te, bila têr şabin bi te.

¹²Çimkî, tu yê rast pîroz dikî, ya Xudan, Bi kerema xwe dora wan tije dikî, wek mertalan.