Read Kurmanji Încîl Zebûr 65 Bible Online

Zebûr 65 - Kurmanji Încîl bible

Zebûr 65

¹Ji bo şefê muzîkê Zebûra Dawid Li Siyonê şikir li benda te ye, ey Xwedê, Sozên ku ji te re hatine dayin, wê bên cih.

²Ey tu, yê ku duayan dibihîze, Wê hemû mirov bên ba te.

³Guneh zora min dibin, Herçî serhildanên me ne, tu wan dibexşînî.

⁴Xwezi bî wî mirovî, ji bo ku li hewşa te rûnê, Te ew bijart û nêzikî xwe kir! Em bi qenciya mala te, Perestgeha te ya pîroz têr dibin.

⁵Ey tu, Xwedayê rizgariya me, Di dadperweriyê de, Bi karên tirsdar didî bersîva me. Ey tu, yê li çaraliyên dinyayê, Hêviya wan ên dûr ên li ser deryayê;

⁶Bi hêzê rapêçandî, Bi hêza xwe çiyayan şidandî,

⁷Yê ku xumîna deryayan, Xumîna pêlan, Û tevliheviya miletan dide rawestan tu yî.

⁸Yên ku rûdinên li wî kujê dinê, Ditirsin ji karên te yên nedîtî. Ji rojhilat heta rojava, Tu wan bi şahî didî qêrîn.

⁹Tu erdê ditoqlinî û wê av didî, Tu wê di nav dewlemendiyê de dihêlî. Çemê Xwedê bi avê tije ye, Çaxê te axê amade kir, Genimê mirov tu amade dikî:

¹⁰Xetên halet tu têr av didî, Axa wan tu sererast dikî, Axê bi baranê dinermijînî, Bereketê didî berên wan.

¹¹Bi qenciyên xwe, tu tacegul datînî ser salê, Ji şopên te bereket dibare,

¹²Çolên te çêre didin, Û gir di şahiyê de dimînin.

¹³Mêrg bi keriyan tên nixamtin, Berrî bi genim tên pêçandin, Bi şahî diqîrin, lavijan dibêjin.