Read Kurmanji Încîl Zebûr 7 Bible Online

Zebûr 7 - Kurmanji Încîl bible

Zebûr 7

¹Li ser gotinên Kûşê Benyamînî Şîgayona Dawid a ji Xudan re. Ez xwe dispêrim te ya Xudanê min, Xelas ke min ji wanên ku ketine pey min. Azad ke!

²Eger ku nebe xelaskarekî min, Wek şêran, Wê perçe bi perçe bikin canê min.

³Ya Xudan Xwedê, eger min ev kiribe: Eger di destê min de, hebe neheqî,

⁴Bêbextî kiribe min bi dostê xwe re, Û bê sedem şêlandibe dijminê xwe,

⁵Bila bi pey min bikeve dijminê min, Min bigire û li erdê xe, Bipelêxe canê min, Û binpê ke rûmeta min.

⁶Bi hêrs rabe, ya Xudan! Bilind bibe li hember xezeba dijminên min! Hişyar bibe ji bo min! Edaletê tu emir bike.

⁷Bila li te bicivin, koma netewan hawirdor, Tu wan îdare bike ji qata jor.

⁸Li miletan hukum dike Xudan, Li min jî hukum bike ya Xudan! Li gor rastî û durustiya min.

⁹Ey Xwedayê rast! Bila dawiya xerabiya xeraban bê, Belê rastan ava ke. Tu ku, dil û aqilan diceribînî.

¹⁰Xwedê mertalê min e, Xelaskarê dilpaqijan e.

¹¹Dadgerek rast e Xwedê, Erê Xwedayek ku, her roj hêrsê dibarîne.

¹²Eger ku venegere însan, Xwedê tûj dike şûran, Bi kişandina kevan, rast dike li armancan.

¹³Amade ne çekên wî yên mirinê, Tîrên wî yên şewitandinê.

¹⁴Va ye yê xerab êşa xerabiyê dikişîne, Bi xerabiyê bi hemle, Derewan tîne.

¹⁵Bîrek kola û ew veda, Bi xwe ket çala ku veda.

¹⁶Xerabiya wî tê serê wî, Zordariya wî ket ser wî.

¹⁷Sipasdar im ji bo rastiya Xudan, Lavijan dibêjim ji bo navê wî yê mezin.