Read Kurmanji Încîl Zebûr 71 Bible Online

Zebûr 71 - Kurmanji Încîl bible

Zebûr 71

¹Ya Xudan, ez xwe dispêrim te, Tu min nede şermê her û her!

²Bi rastdariya xwe tu min azad ke, Goh bide min, min rizgar ke!

³Tu bibe zinarê min ê starê, Da ku ez hergav bêm te; Te emir da ji bo rizgarkirina min, Çimkî tu yî zinar û kela min.

⁴Ey Xwedayê min, tu min xelas ke, Ji destê zilamê xerab, fesad û xedar!

⁵Çimkî hêviya min tu yî, ya Reb Xudan, Ji xortaniya xwe ve, yê ez pê ewle me tu yî.

⁶Ji roja ku ez çêbûm vir ve, tu ji min re bûyî destek, Te ez ji malzaroka diya min deranî û anîm dinê. Sipasiya min hergav ji te re ye.

⁷Ji bo gellekan ez wek tiştek ecêb im, Belê tu stargeha min a hêzdar î.

⁸Pesnê te hergav li ser zimanê min, Tevahiya rojê berziya te di bîra min.

⁹Di pîrbûnê de tu min ji xwe navêje, Gava ku ez ji taqetê ketim, tu min bernede!

¹⁰Çimkî dijminên min qala min dikin, Yên ku dixwazin min bikujin, bi hev dişêwirin,

¹¹Ji hev re dibêjin, «Xwedê ew berda! Bi pey bikevin, wî bigirin, Çimkî kes wî xelas nake!»

¹²Ey Xwedê, dûr nemîne ji min, Ey Xwedayê min, tu bi lez were alîkariya min!

¹³Yên ku dijminên min in, bila şerm bikin, biqelin, Yên li ziyana min digerin, bila bi şermî û rezaletê bên nixamtin.

¹⁴Belê ez hergav hêvîdar im, Ji bo te pesindar û spasdar im.

¹⁵Dadperwerî û rizgarkirina te, Tevahiya rojê li ser devê min e Îcar hejmara wan ne karê zanîna min e.

¹⁶Ezê bi karên mezin ên Reb Xudan werim, Ezê rastdariya te, tenê ya te bîr bînim.

¹⁷Ey Xwedê, ji zaroktiya min ve te ez fêr kirim, Karên te yên rewnaq hê jî ez dibêjim.

¹⁸Ez pîr û porsipî bibim jî, Heta ku ez hêza te ji her nifşî re, Karîna te ji hemû yên bên re nebêjim, Tu min bernede, ey Xwedê.

¹⁹Ey Xwedê, rastdariya te digîhije ezman, Tu ku, te karên mezin kir, Ma kî dimîne te, ey Xwedê?

²⁰Tu ku, te gellek tengahiyên xerab nîşanî me da, Tu dîsa me vedijînî, Tu dîsa me ji kûrahiya axê dertînî.

²¹Tê siyaneta min zêde bikî, Li min vegerî û min teselî bikî.

²²Ezê ji bo dilsoziya te, Bi çengê pesnê te bidim, ey Xwedayê min, Bi Lîrê, bi lavijan pesnê te bidim, Ey Pîrozê Îsraêlê!

²³Gava ez bi lavijan pesnê te bidim, Wê canê min û lêvên min şahiya xwe bînin ziman, Çimkî te xelas kir wan.

²⁴Wê zimanê min jî tevahiya rojê dadperweriya te bêje, Çimkî yên ku li xesara min digeriyan, Şermî bûn û rûyê wan reş bû.