Read Kurmanji Încîl Zebûr 83 Bible Online

Zebûr 83 - Kurmanji Încîl bible

Zebûr 83

¹Lavij, Zebûra Asaf Ey Xwedê, hiş nebe, Bêdeng û bêtevger nemîne ey Xwedê!

²Binêre, dijminên te tevliheviyê dertînin, Yên ku ji te nefret dikin, serî hiltînin.

³Li hember gelê te civînên hîlekar datînin, Li hember yên ku tu diparêzî, şêwr dikin.

⁴Dibêjin, «Werin em wan tune bikin, bila nebin milet, Bila êdî navê Îsraêlê neyê bibîranîn!»

⁵Hemûyan dilê xwe kirin yek, li hev şîret kirin, Li hember te peyman çêkirin:

⁶Konên Edomê û Simaîliyan, Moab û Haceriyan,

⁷Gebal, Ammon û Amalek, Gelê Sûr û Filîstî,

⁸Aşûr jî bi wan re bû yek, Hêz dan lawên Lûtiyan.

⁹Ya ku te bi Mîdyanê kir, bi wan jî bike, Çawa ku te bi Sîsera û li newala Kîşonê bi Yabîn kir.

¹⁰Ew li Endorê helaq bûn, Ji bo axê bûn hok.

¹¹Esîlzadên wan, wek Oreb û Zeeb bike, Ya ku te anî serê Zehab û Salmûna, bîne serê begên wan.

¹²Wan got, «Werin em mêrgên Xwedê, Ji xwe re bikin milk.»

¹³Ey Xwedayê min, tu wan wek babelîska tozê, Wek kaya ber bayê bike!

¹⁴Wek pêta ku daristanê dişewitîne, Wek alava ku çiyan digire,

¹⁵Bi bagera xwe bi pey wan bikeve, Bi babelîska xwe wan têxe sawê!

¹⁶Ruyê wan bi şermê binixême, Da ku li navê te bigerin ya Xudan.

¹⁷Bila her û her şerm bikin û şaş bimînin, Bila tune bibin û rûswa bimînin.

¹⁸Da ku hîn bibin navê te Xudan e, Li ser tevahiya dinê, tenê tu berz î.