Read Kurmanji Încîl Zebûr 92 Bible Online

Zebûr 92 - Kurmanji Încîl bible

Zebûr 92

¹Zebûr, ji bo roja Sebtê lavij Ya Xudan, ji te re spaskirin, Ey Yê Herî Berz, bi lavijan pesnê navê te dayin,

²Serê sibê kerema te, Her şev dilsoziya te,

³Bi tembûra deh têl, bi çeng û bi lîrê, Bi dengê bi aheng îlankirin, çi xweş e!

⁴Çimkî ya Xudan, te bi karê xwe ez şa kirim, Li ber karên destê te, ez bi şahî lavijan dibêjim.

⁵Karên te çi mezin in, ya Xudan! Û çiqas kûr in ramanên te!

⁶Zilamê evdal nizane, Û yê ehmaq, vê fêm nake.

⁷Wek giya şînbûna xeraban, Hergav şaxdayina yên ku dikin fesadiyan, Ji bo her û her hilweşîna wan e.

⁸Belê tu ya Xudan, tu her û her berz î.

⁹Va ye, dijminên te ya Xudan, Va ye, wê dijminên te tune bibin, Hemû yên sûcdar, wê belav bibin.

¹⁰Te ez bi qasî gakuviyekî hêzdar kirim, Rûnê teze bi serê min de rêt.

¹¹Çavên min, ketina dijminên min dîtin, Gohên min, şikestina dijminên min bihîstin.

¹²Zilamê rastdar, wê wek dara xurmê geş bibe, Wek dara Sedir a Lubnanê mezin bibe.

¹³Ew li mala Xudan hatine danîn, Wê li hewşa Xwedayê me şitil bidin.

¹⁴Wê di pîrbûna xwe de jî meyve bidin, Ewê terr û şîn bin.

¹⁵Ewê nîşan bidin ku Xudan rast e! Zinarê me ew e, li ba wî neheqî tune.