Read Kurmanji Încîl Şîretên Silêman 12 Bible Online

Şîretên Silêman 12 - Kurmanji Încîl bible

Şîretên Silêman 12

¹Kesê ji terbiyeyê hez dike, ji zanînê hez dike, Lê kesê ji erzşikandinê nefretê dike, sexik e.

²Xudan ji mirovê qenc razî ye, Lê ew mirovê hîlekar sûcdar dike.

³Mirov bi xerabiyê nakeve ewlehiyê, Lê koka kesê rast qet naleqe.

⁴Jina çê taca serê mêrê xwe ye, Lê jina şermê tîne, rizîbûna hestiyê wî ye.

⁵Fikrên kesên rast adil in, Lê rêberiya xeraban bihîle ye.

⁶Gotina xeraban kemîna xwînê ye, Lê devê dilrastan wan rizgar dike.

⁷Xerab hildiweşin û tune dibin, Lê mala rastan ava ye.

⁸Mirov li gorî serwextiya xwe tê pesindan, Lê dilxerab tê kêmdîtin.

⁹Kesê xweyî xulam ê kêmketî, Ji kesê qure yê birçî çêtir e.

¹⁰Rast hewcedariya heywanê xwe dizane, Lê rehma xeraban jî zordarî ye.

¹¹Kesê axa xwe dajo, bi nên têr dibe, Kesê dide pey tiştên vala, kêmaqil e.

¹²Xerab li pey qezenca neheq e, Lê koka rastan bereketê dide.

¹³Xerab bi neheqiya lêvên xwe dikevin dafikê, Lê rast ji tengasiyê rizgar dibin.

¹⁴Mirov bi berê devê xwe ji qenciyê têr dibe, Bi karê destê xwe jî heqê xwe distîne.

¹⁵Riya kesê ehmeq di çavê wî de rast e, Lê şehreza guhdariya şîretê dike.

¹⁶Ehmeq yekser hêrsa xwe kifş dikin, Lê aqilmend guh nadin tinazan.

¹⁷Kesê bi nefesa xwe rastiyê dibêje, edaletê tîne, Lê şahidê derewîn jî hîlekar e.

¹⁸Gotinên bêfikar wekî birîna şûr e, Lê zimanê şehrezayan şifa ye.

¹⁹Lêvên dilsoz heta hetayê dimînin, Lê zimanê derewîn demdemî ye.

²⁰Di dilê kesê xerabiyê pîlan dike de hîlekarî, Lê li ba şêwirmendên aştiyê şabûn heye.

²¹Tu xerabî nayê serê rastan, Lê kesên xerab bi belayê têr in.

²²Lêvên derewîn ji bo Xudan kirêt in, Lê ew ji kesên dilsoz razî ye.

²³Aqilmend zanabûna xwe nîşan nade, Lê dilê bêaqilan ehmeqiyê radigihîne.

²⁴Destê zîrekan serweriyê dike, Lê tiral dibin sûxrevan.

²⁵Xema di dil de mirovan ditewîne, Lê gotineke baş wan dilşa dike.

²⁶Rast rê nîşanê hevalê xwe jî dide, Lê riya xeraban wan averê dike.

²⁷Tiral karê xwe nabe serî[4], Lê zîrek dibin xweyê serweteke mezin.

²⁸Riya rastiyê jiyan e, Tê de mirin tuneye.