Read Kurmanji Încîl Şîretên Silêman 13 Bible Online

Şîretên Silêman 13 - Kurmanji Încîl bible

Şîretên Silêman 13

¹Kurê şehreza guh dide terbiyeya bavê xwe, Lê tinazkar guhdariya erzşikandinê nake.

²Ji gotinên devê xwe, mirovê qenc qenciyê dixwe, Lê nefesa bêbextan zordarî ye.

³Kesê devê xwe digire, canê xwe diparêze, Lê kesê devê xwe nagire, helak dibe.

⁴Canê kesê tiral çilek e, lê tiştekî nabîne Lê canê kesê zîrek firehiyê dibîne.

⁵Kesê rast ji derewan nefretê dike, Kirinên kesê xerab şermezarî ye.

⁶Rastî, kesê di riya xwe de kamil e, diparêze, Lê xerabî kesê sûcdar serobino dike.

⁷Mirov heye tiştekî wî tuneye, Lê xwe maldar nîşan dide. Kesê din jî xwe feqîr nîşan dide, Lê gelekî dewlemend e.

⁸Serweta kesekî berdêla canê wî ye, Lê feqîr gefxwarinê nabihîze.

⁹Ronahiya kesên rast bi şahî pê dikeve, Lê qendîlên xeraban ditefe.

¹⁰Ji quretiyê tenê pevçûn derdikeve, Lê kesê şêwrê qebûl dike, şehreza ye.

¹¹Malê bi lez û bez hatiye qezenckirin kêm dibe, Lê kesê ku bi destan dide hev, jê re zêde dibe.

¹²Hêviya dereng dimîne, dil diêşîne, Lê daxwaza pêk tê, dara jiyanê ye.

¹³Kesê şîretê kêm dibîne helakê tîne serê xwe, Lê kesê ji emran ditirse xelatê distîne.

¹⁴Hînkirina şehrezayan kaniya jiyanê ye, Mirovan ji dafikên mirinê dûr dixe.

¹⁵Serwextiya baş keremê tîne, Lê riya bêbextan helakbûn e[5].

¹⁶Her aqilmend her kirinên xwe bi zanatî dike, Lê bêaqil ehmeqiya xwe nîşan dide.

¹⁷Bela tê serê qasidê xerab, Lê şandiyê dilsoz şifa ye.

¹⁸Feqîrî û riswatî tê serê kesê terbiyeyê davêje pişt guhê xwe, Lê guhdarê erzşikandinê tê rûmetkirin.

¹⁹Daxwaza pêk tê ji bo can kêf e, Ji xerabiyê dûrketin ji bo kesê bêaqil kirêtî ye.

²⁰Kesê bi şehrezayan re digere şehreza dibe, Lê hevalê bêaqilan xesarê dibîne.

²¹Xerabî dide pey gunehkaran, Lê qencî dibe xelata rastan.

²²Mirovê qenc ji neviyên xwe re mîrasê dihêle, Lê serweta gunehkaran ji bo rastan kom dibe.

²³Dibe ku zeviya feqîran bi têra xwe ber bide, Lê heger edalet tunebe, jê tê standin.

²⁴Kesê ço ji kurê xwe texsîr dike, jê nefretê dike, Lê kesê ji kurê xwe hez dike, wî rêkûpêk terbiye dike.

²⁵Kesên rast heta têr dibin dixwin, Lê zikê xeraban herdem vala ye.