Read Kurmanji Încîl Şîretên Silêman 15 Bible Online

Şîretên Silêman 15 - Kurmanji Încîl bible

Şîretên Silêman 15

¹Bersiva nerm hêrsê datîne, Lê gotina hişk kela xezebê radike.

²Zimanê şehrezayan zanînê baş kifş dike, Lê ji devê bêaqilan ehmeqî diherike.

³Çavê Xudan li her derê ye, Ew qenc û xeraban dibîne.

⁴Zimanê şifayê dara jiyanê ye, Lê zimanê derewîn ruhan birîndar dike.

⁵Ehmeq terbiyeya bavê xwe kêm dibîne, Lê kesê guh dide erzşikandinê, jîr e.

⁶Li mala rastan xezîneyeke mezin heye, Lê di debara xeraban de zehmetî heye.

⁷Lêvên şehrezayan zanînê belav dike, Lê dilê bêaqilan ne wisa ye.

⁸Qurbana xeraban li ber Xudan kirêt e, Lê ew ji duaya dilrastan razî ye.

⁹Riya xeraban li ber Xudan kirêt e, Lê ew ji kesên li pey edaletê, hez dike.

¹⁰Terbiyeya zor ji kesê averê re ye, Lê kesê ji erzşikandinê nefretê dike, wê bimire.

¹¹Avaddon[9] û diyarê miriyan jî li ber çavê Xudan vekirî ye, Nexasim dilê mirovan!

¹²Tinazkar ji erzşikandinê hez nake, Ew naçe ba şehrezayan.

¹³Dilê şa beşera xweş e, Lê dilê kul rih diperçiqîne.

¹⁴Dilê kesê fêmdar li zanabûnê digere, Lê devê bêaqilan ehmeqiyê diçêre.

¹⁵Hemû rojên bindestan xerab in, Lê dilekî şa herdem ziyafetê dike.

¹⁶Hebûna biçûk a bi tirsa Xudan, Ji xezîneya mezin a bi xem û xofan çêtir e.

¹⁷Xwarina pincarê ya li dera ku hezkirin heye, Ji goştê gayê dermalekirî yê bi nefretê çêtir e.

¹⁸Mirovê hêrsok pevçûnê dertîne, Lê kesê zû hêrs nabe, şer radiwestîne.

¹⁹Riya tiralan sinca bi dirî ye, Lê rêçika dilrastan kolana fireh e.

²⁰Kurê şehreza bavê xwe şa dike, Lê bêaqil diya xwe kêm dibîne.

²¹Ji kesê kêmaqil re ehmeqî şahî ye, Lê mirovê fêmdar riya xwe rast dike.

²²Gava şêwir nabe, pîlan vala derdikevin, Lê zêdebûna şêwirmendan serketinê tîne.

²³Mirov bi bersiva maqûl şa dibe, Gotina di cih de tê gotin, çiqas xweş e!

²⁴Ji bo biaqil, riya jiyanê ber bi jor ve diçe Ku nekeve diyarê miriyan.

²⁵Xudan mala qureyan xera dike, Lê sînorê jinebiyan zexim dike.

²⁶Fikrên xerab li ber Xudan kirêt in, Lê gotinên keremê pak in.

²⁷Kesê çavê wî li qezenca neheq e, Tengasiyê dide mala xwe, Lê kesê ji bertîlê nefretê dike, wê bijî.

²⁸Dilê kesê rast ji bo bersivê kûr difikire, Lê ji devê xeraban xerabî diherike.

²⁹Xudan ji xeraban dûr e, Lê duaya rastan dibihîze.

³⁰Ronahiya çavan şahiyê dide dilan, Xebera baş hestiyan dişidîne.

³¹Kesê guh dide erzşikandina ku jiyanê tîne, Di nav şehrezayan de rûdine.

³²Kesê terbiyeyê davêje pişt guh, xwe jî red dike, Lê kesê guh dide erzşikandinê, şehrezayiyê bidest dixe.

³³Tirsa Xudan şîreta şehrezayiyê ye, Nefsbiçûkî şertê pêşî yê rûmetê ye.