Read Kurmanji Încîl Şîretên Silêman 2 Bible Online

Şîretên Silêman 2 - Kurmanji Încîl bible

Şîretên Silêman 2

¹Lawo, heger tu gotinên min qebûl bikî, Emrên min di dilê xwe de hilînî,

²Heger tu guhdariya şehrezayiyê bikî Û dilê xwe ber bi fêmdariyê ve meyildar bikî,

³Heger tu gazî têgihîştinê bikî Û dengê xwe ji bo fêmdariyê bilind bikî,

⁴Heger wekî zîv li wê bigerî Û wekî xezîneyê li pey wê bikevî,

⁵Wî çaxî tê tirsa Xudan fêm bikî Û zanîna Xwedê peyda bikî.

⁶Çimkî yê ku şehrezayiyê dide Xudan e, Ji devê wî zanabûn û fêmdarî dibare.

⁷Ew şîretê ji bo kesên dilrast hildide. Ji bo kesên di riya xwe de kamil in, mertal e,

⁸Ew rêçikên edaletê diparêze, Hay ji riya dilsozên xwe heye.

⁹Wî çaxî tê fêm bikî Ku rastî, edalet, wekhevî û her riya qenc çi ye.

¹⁰Çimkî wê şehrezayî bikeve dilê te, Zanîn li xweşa canê te here.

¹¹Wê feraset ji bo te bibe parêzvan Û fêmdarî ji bo te bibe nobedar

¹²Ku te ji riya xerab, Ji gotina kesê şaş rizgar bike.

¹³Ew dev ji rêçikên rast berdide Ku di riyên tarî de biçe.

¹⁴Ew bi xerakirinê şa dibin Û bi zêdehiya xerabiyê dilgeş dibin.

¹⁵Riyên wan xwar in, Rêçikên wan hîlekar in.

¹⁶Wê şehrezayî te ji jina çavlider, Ji zimanşîrîniya jina bêwefa rizgar bike.

¹⁷Wê te ji jina helalê ciwaniya xwe berdide Û peymana li ber Xwedayê xwe kiriye ji bîr dike, rizgar bike.

¹⁸Çimkî mala wê berjêrî mirinê dike, Riyên wê jî dibe warê miriyan.

¹⁹Tu kesê ku çûye ba wê venagere Û nagihîje riyên jiyanê.

²⁰Loma di riya qencan de here, Rêçikên rastan herdem bidomîne.

²¹Çimkî kesên dilrast wê li welêt bijîn, Kesên bêsûc wê li welêt bimînin.

²²Lê kesên xerab wê ji welêt bên avêtin Û koka xayînan bê rakirin.