Read Kurmanji Încîl Şîretên Silêman 21 Bible Online

Şîretên Silêman 21 - Kurmanji Încîl bible

Şîretên Silêman 21

¹Dilê padîşah coya avê ye ku di destê Xudan de ye, Bi ku ve bixwaze, dişîne wê derê.

²Hemû riya mirovekî di çavê wî de rast e, Lê Xudan dilan datîne ser mêzînê.

³Li gorî Xudan pêkanîna rastî û edaletê, Ji pêşkêşkirinê çêtir e.

⁴Dilquretî û pozbilindî Qendîla xeraban e û guneh e.

⁵Pîlanên kesê zîrek esse qezencê tîne, Lê her kesê dilezîne esse digihîje xizaniyê.

⁶Xezîneya bi zimanê derewîn tê çêkirin, Wekî mijê derbas dibe û dafika mirinê ye.

⁷Wê zordariya xeraban wan hilde û bibe, Çimkî ew naxwazin edaletê bikin.

⁸Riya sûcdaran xwar e, Lê karê dilrastan pak e.

⁹Li kujê banê xanî rûniştin, Ji rûniştina malê ya bi jina şerûd re çêtir e.

¹⁰Canê xeraban xerabiyê dixwaze, Cîranên wan di çavê wan de keremê nabînin.

¹¹Gava tinazkar tê cezakirin, sexik şehrezatir dibe, Çaxê şehreza tê hînkirin, zanîna wî zêdetir dibe.

¹²Yê rast li mala kesê xerab dinêre, Ew bi felaketan, xeraban serobino dike.

¹³Kesê guhê xwe nade hewara belengazan, Kes bersiva hewara wî jî nade.

¹⁴Diyariya bi dizî tê dayîn hêrsê, Bertîla di hembêzê de tê dewisandin, xezeba dijwar datîne.

¹⁵Kirina edaletê şahiya rastan e, Lê ji bo kesê xerabî dike, tirs û saw e.

¹⁶Mirovê ji riya aqilmendiyê averê dibe, Di nav koma miriyan de bêhna xwe vedide.

¹⁷Kesê ji şahiyê hez dike digihîje xizaniyê, Kesê ji rûn û şerabê hez dike dewlemend nabe.

¹⁸Bergîdana kesê rast, kesê xerab e Bergîdana dilrastan jî bêbext e.

¹⁹Rûniştina li beriyê, Ji rûniştina bi jina şerûd û bihêrs re çêtir e.

²⁰Xezîneyên hêja û rûnê zeytê li mala şehrezayan hene, Lê bêaqil hebûna xwe jî dadiqurtîne.

²¹Kesê dide pey rastî û dilovaniyê, Jiyan, rastî û rûmetê dibîne.

²²Şehreza êrîşê bajarê hêzdaran dike Û birca pê ewle ne, tîne xwarê.

²³Kesê bi dev û zimanê xwe dikare, Canê xwe ji tengasiyan diparêze.

²⁴Kesê qure û pozbilind, navê wî tinazkar, Karên wî bi quretiyê diherikin.

²⁵Daxwaza kesê tiral wî dikuje, Çimkî destê wî xebatê red dike.

²⁶Mirov heye herdem dixwaze, Lê kesê rast dide û texsîr nake.

²⁷Qurbana xeraban kirêt e, Nexasim gava bi niyeta xerab tînin!

²⁸Şahidê derewîn tune dibe, Lê kesê guhdar e, şahidiya wî herdem ewle ye.

²⁹Kesê xerab rûyê xwe tirş û dijwar dike, Lê dilrast riya xwe saxlem dike.

³⁰Ne şehrezayî, ne fêmdarî, ne jî şêwir heye Ku li dijî Xudan bi ser bikeve.

³¹Hesp ji bo roja şer tê amadekirin, Lê serfirazî ji Xudan e.