Read Kurmanji Încîl Şîretên Silêman 23 Bible Online

Şîretên Silêman 23 - Kurmanji Încîl bible

Şîretên Silêman 23

¹Çaxê tu bi serwerekî re li ser xwarinê rûdinî, Bala xwe baş bide ya ku[12] li ber te ye

²Û heger dilê te pir diçê, Kêrê deyne ser qirika xwe.

³Bila dilê te neçe xwarinên wî yên bilezet, Çimkî ew nanê hîleyê ye.

⁴Xwe newestîne ku dewlemend bibî, Dev ji vê fikrê berde.

⁵Çaxê te çav berdayê, serwet namîne Çimkî baskan ji xwe re çêdike Û wekî teyrekî difire ezmanan.

⁶Tu nanê kesê çikûs nexwe, Bila dilê te neçe xwarinên wî yên bilezet.

⁷Çimkî ew pariyên devê te dijmêre, Ji te re dibêje: «Bixwe, vexwe!» Lê dilê wî ne li ser te ye.

⁸Tê pariyê xwariye vereşî Û gotinên te yên şîrîn wê bêkêr bin.

⁹Li ber bêaqilan nepeyive, Çimkî ew serwextiya peyvên te kêm dibînin.

¹⁰Cihê sînorê kevin neguherîne Û nekeve zeviya sêwiyan.

¹¹Çimkî Rizgarkarê wan[13] hêzdar e, Wê doza wan li dijî te bike.

¹²Bila dilê te li ser terbiyeya te be Û guhê te li ser gotinên zanînê.

¹³Terbiyeyê ji zarokên xwe texsîr neke, Tu ço jî lê bixî, wê nemire.

¹⁴Heger tu ço lê bixî, Tê canê wî ji diyarê miriyan rizgar bikî.

¹⁵Lawo, heger dilê te şehreza be, Wê dilê min jî şa be.

¹⁶Gava lêvên te gotinên rast bibêjin, Wê canê min şa bibe.

¹⁷Bila dilê te hesûdiya gunehkaran neke, Lê herdem bi tirsa Xudan bijî.

¹⁸Bi vî awayî wê pêşerojek hebe, Wê hêviya te winda nebe.

¹⁹Lawo, bibihîze û şehreza be, Dilê xwe bide ser riya rast.

²⁰Ne di nav serxweşên şerabê de, Ne jî bi têrnexwaran re bibe.

²¹Çimkî wê serxweş û têrnexwar feqîr bibe Û wê xewarî jî wekî potikan xwe li wan bike.

²²Tu guh bide bavê xwe ku can daye te Û diya xwe kêm nebîne gava pîr bibe.

²³Rastiyê bikire û nefiroşe, Terbiye, şehrezayî û fêmdariyê jî bikire.

²⁴Bavê kesê rast dilgeş e, Kesê can bide kurê şehreza pê şa dibe.

²⁵Bila dê û bavê te şa bin, Diya tu aniye dinyayê dilgeş be.

²⁶Lawo, dilê xwe bide min, Bila çavê te baş binêre li riyên min.

²⁷Çimkî fahîşe çaleke kûr e Û jina bêwefa bîreke teng e.

²⁸Ew wekî rêbir kemînê datîne Û zilamên bêbext zêde dike.

²⁹Axîn ya kê ye? Waxîn ya kê ye? Pevçûn ya kê ye? Gilî û gazin ya kê ye? Birînên bêsedem û çavên sorbûyî yên kê ne?

³⁰Kesên li ser şerabê rûniştine û ranabin, Kesên şerabên tevlihev diceribînin.

³¹Gava şerab sor dibe û di kasê de dibiriqe, Li xweşherikîna gewriyê nenêre.

³²Di dawiyê de wekî marekî pê vedide, Wekî koremarekî gez dike.

³³Wê çavê te tiştên xerîb bibîne, Wê dilê te tiştên xerab bibêje.

³⁴Tê bibî wekî kesê carna li nav deryayê, Carna jî li ser stûna gemiyê radizê.

³⁵Tê bêjî: «Li min xistin lê ez ne êşiyam, Li min dan lê bi xwe nehesiyam. Ezê kengê hişyar bim Ku ez dîsa vexwim?»