Read Kurmanji Încîl Şîretên Silêman 24 Bible Online

Şîretên Silêman 24 - Kurmanji Încîl bible

Şîretên Silêman 24

¹Hesûdiya mirovên xerab neke, Nexwaze ku tu bi wan re bî.

²Çimkî dilê wan li ser zordariyê difikire Û devê wan behsa belayan dike.

³Bi şehrezayiyê mal tê avakirin, Bi fêmdariyê tê xurtkirin.

⁴Bi zanabûnê odeyên wan, Bi her cure tiştên xweş û hêja tije dibin.

⁵Şehreza hêzdar dibe, Zana qewetê zêde dike.

⁶Çimkî tu bi rêberiyê şerê xwe dikî Û bi zêdebûna şêwirmendan serfiraz dibî.

⁷Şehrezayî ji bo ehmeqan gelekî bilind e, Ew li ber dergehê bajêr devê xwe venakin.

⁸Ji mirovê xerabiyê dişêwire re, Mirovê hîlekar tê gotin.

⁹Pîlankirina ehmeqiyê guneh e, Tinazkar ji mirovan re kirêt e.

¹⁰Heger tu di roja teng de sist bî, Hêza te jî tengezar e.

¹¹Kesên li ber kuştinê rizgar bike, Kesên bi kulekî dibin serjêkirinê bigire û nehêle.

¹²Heger tu bêjî: «Lê min ev nizanibû» Ma Yê ku dilan datîne ser mêzînê fêm nake? Ma Yê ku canê te diparêze nizane? Ma wê bergîdana kirinên hemû mirovan nede?

¹³Lawo, hingiv bixwe, çimkî qenc e, Hingivê safî ji devê te re şîrîn e.

¹⁴Bizane ku şehrezayî jî ji bo canê te wisa ye, Heger tu wê bibînî, wê dawiya te baş be Û wê hêviya te vala dernekeve.

¹⁵Ya zilamê xerab, li dijî mala kesê rast kemînê daneyine, Warê wî xera neke.

¹⁶Çimkî rast heft caran bikevin jî, dîsa radibin, Lê di felaketê de kesên xerab wêran dibin.

¹⁷Bi ketina dijminê xwe şa nebe Û bi terpilîna wî, bila dilê te kêfxweş nebe.

¹⁸Naxwe wê Xudan vê yekê bibîne, Wê razî nebe Û hêrsa xwe ji ser wî rake.

¹⁹Ji ber xeraban, xeman nexwe, Hesûdiya mirovên xerab neke.

²⁰Çimkî pêşeroja xeraban tuneye Û qendîla xeraban ditefe.

²¹Lawo, ji Xudan û padîşah bitirse Û nebe alîgirê serhildêran.

²²Çimkî felaketa wan ji nişkave tê, Gelo kî dizane wê ji herduyan çi were serê wan.

²³Ev jî gotinên şehrezayan in: Di dîwanê de ferq û meylî ne baş e.

²⁴Kesê ji kesê xerab re dibêje: «Tu rast î» Wê gel naletê li wî bibarîne, netewe nefretê jê bike.

²⁵Xwezî bi wan ku erzê xeraban dişikênin, Bereketa qenc bi ser wan de tê.

²⁶Kesê bersiva dirust dide, Çawa ku lêvan ramûse.

²⁷Tu li derve pergalê bide karê xwe, Zeviya xwe amade bike. Paşê mala xwe ava bike.

²⁸Bêsedem li dijî cîranê xwe şahidiyê neke, Bi lêvên xwe nexapîne.

²⁹Nebêje: «Ya wî li min kir, ezê jî lê bikim, Li gorî kirina wî lê vegerînim.»

³⁰Ez di nav zeviya kesê tiral, Di nav rezê mirovê kêmaqil re derbas bûm.

³¹Va ye li her derê dirî derketibûn, Giyayê gezgezkê bi ser ketibû, Dîwarê kevir hatibû hilweşandin.

³²Min dît û ez kûr fikirîm, Min nihêrî û min jê şîretê girt.

³³Hinekî xew, hinekî xewarî, Hinekî destê xwe bide hev û bêhna xwe vede,

³⁴Bi vî awayî wê feqîrî wekî rêbirekî bê ser te, Xizanî wekî şervanekî bê ser te.