Read Kurmanji Încîl Şîretên Silêman 27 Bible Online

Şîretên Silêman 27 - Kurmanji Încîl bible

Şîretên Silêman 27

¹Pesnê xwe bi sibê nede, Çimkî tu nizanî wê ew roj çi bîne.

²Bila kesekî din pesnê te bide, ne devê te, Bila yê din li ser te bêjin, ne lêvên te.

³Kevir giran e, sêlak jî bar e, Lê kedera kesê ehmeq ji herduyan jî girantir e.

⁴Xezeb xedar e, hêrs jî lehî ye, Lê kî dikare li ber hesûdiyê bisekine?

⁵Erzşikandina eşkere, Ji hezkirina veşartî çêtir e.

⁶Birînên dostan ewle ne, Lê maçên dijminan xapînok in.

⁷Kesê têr hingivê jî naxwaze, Lê ji kesê birçî re xwarina tehl şîrîn e.

⁸Mirovê welatê xwe hiştî, Wekî çivîka ji hêlîna xwe averê bûye.

⁹Rûn û bixûr dilşa dike, Şîrînbûna hevalan jî şêwra ji dil û can e.

¹⁰Dostê xwe û dostê bavê xwe bernede, Di roja xwe ya felaketê de, neçe mala birayê xwe. Cîranê nêzîk ji birayê dûr çêtir e.

¹¹Lawo, şehreza be û dilê min şa bike Ku ez bersiva kesê tinazê xwe li min dike bidim.

¹²Aqilmend gava xerabiyê dibîne xwe vedişêre, Sexik xwe davêje pêş û xesarê dibîne.

¹³Cilê kesê ji xerîb re bûye kefîl bistîne, Ji kesê ji biyanî re bûye kefîl gerew bistîne.

¹⁴Gava kesê serê sibê zû radibe Ku bi dengekî bilind cîranê xwe pîroz dike, Wê ev yek wekî nalet bê hesibandin.

¹⁵Dilopa ku di roja baranê de nasekine Û jina şerûd, wekî hev in.

¹⁶Girtina wê jinê wekî girtina bayê ye Û wekî wî kesî ye ku bi destê rastê rûnê digire.

¹⁷Çawa ku hesin bi hesinê tûj dibe, Wisa jî heval, hevalê xwe tûj dike.

¹⁸Kesê darhejîrê xweyî dike, ji berê wê dixwe, Kesê li xweyê xwe xweyî dike, birûmet dibe.

¹⁹Çawa ku av rû nîşan dide, Dil jî nava mirovan nîşan dide.

²⁰Çawa ku Avaddon[15] û diyarê miriyan têr nabin, Wisa jî çavên mirovan tu caran têr nabin.

²¹Agirdank ji bo zîv, êtûn ji bo zêr e, Lê hêjabûna mirovan bi pesindanê kifş dibe.

²²Kesê ehmeq bi genim re di coniyê de, Bi mîrkûtê bikutî jî, Ehmeqiya wî jê naçe.

²³Baş hay ji pezê xwe hebe, Dilê te li ser keriyê te be.

²⁴Çimkî dewlemendî her û her namîne, Û tac bi xwe jî ne ji bo her nifşî ye.

²⁵Gava çîmen namîne û ji nû ve şîn dibe, Gava giyayê çiyê tê civandin,

²⁶Wê berx ji bo cil û bergên te bin, Berdêla zeviyê jî, nêrî bin.

²⁷Wê şîrê bizinan têra xwarina te, mala te Û debara xizmetkarên te bike.