Read Kurmanji Încîl Şîretên Silêman 3 Bible Online

Şîretên Silêman 3 - Kurmanji Încîl bible

Şîretên Silêman 3

¹Lawo, hînkirina min ji bîr neke, Emrên min di dilê xwe de ragire.

²Çimkî wê ev roj û salên emrê te dirêj bikin Û silametiya te zêde bikin.

³Nehêle ku dilsozî û dilovanî te berdin, Wan bixe stûyê xwe, Li ser textê dilê xwe binivîse.

⁴Wî çaxî tê li ber çavê Xwedê û mirovan, Navdar û keremdar bî.

⁵Bi hemû dilê xwe ewle be bi Xudan, Xwe nespêre fêmdariya xwe.

⁶Di hemû riyên te de bila ew di bîra te de be Ku rêçikên te rast bike.

⁷Xwe di çavê xwe de şehreza nebîne. Ji Xudan bitirse, ji xerabiyê xwe bide alî.

⁸Wê ev ji bo bedena te bibe şifa, Ji bo hestiyên te bibe tezekirin.

⁹Bi mal û milkê xwe û bi hemû berê xwe yê pêşî, Qedrê Xudan bigire.

¹⁰Loma wê embarên te bi zêdebarî tije bibin, Ji mehserên te şeraba nû birijin.

¹¹Lawo, terbiyekirina Xudan red neke, Ji erzşikandina wî aciz nebe.

¹²Çimkî çawa ku bavek, Erzê kurê xwe yê jê razî ye, dişikêne, Xudan jî erzê kesê jê hez dike dişikêne.

¹³Xwezî bi wî mirovê ku şehrezayî dîtiye Û fêmdariyê bi dest bixe.

¹⁴Çimkî qezenca wê ji zîv zêdetir e, Kara wê ji zêrê xas çêtir e.

¹⁵Ew ji cewheran hêjatir e, Hemû tiştên tu dixwazî, wekî wî nabin.

¹⁶Di destê wê yê rastê de emrê dirêj, Di destê wê yê çepê de rûmet û dewlemendî hene.

¹⁷Riyên wê riyên keremê ne, Hemû rêçikên wê yên aştiyê ne.

¹⁸Ji bo kesên wê bistînin, ew dara jiyanê ye, Kesên wê digirin bextewar in.

¹⁹Xudan bi şehrezayiyê bingeha dinyayê danî, Bi fêmdariyê ezman bi hev ve kirin.

²⁰Bi zanabûna wî kûrahiyên deryayan ji hev veqetiyan Û ji ewran xunav dibare.

²¹Lawo, bila ev ji ber çavê te nerevin, Tu şîret û feraset bernede.

²²Wê ji bo canê te bibin jiyan Û ji bo stûyê te bibin xemil.

²³Wî çaxî tê bi ewlehî bidî ser riya xwe, Wê lingê te neterpile.

²⁴Tê bêtirs û saw razêyî, Tê xwe vezelînî û wê xew şîrîn be.

²⁵Ji sawa bêwext Û felaketa tê serê xeraban netirse.

²⁶Çimkî ewlebûna te bi Xudan e, Wê nehêle ku lingê te bikeve dafikê.

²⁷Heta ji destê te tê, Qenciyê ji kesê heq dike re texsîr neke.

²⁸Heger bi te re hebe, Ji cîranê xwe re nebêje: «Îro here, sibê were!»

²⁹Li dijî cîranê xwe xerabiyê nefikire, Ew bi ewlehî li ba te rûdine.

³⁰Heger xerabiyê bi te nekiribe, Bêsedem bi tu kesî re pev neçe.

³¹Hesûdiya mirovê zordar neke, Tu riyên wî hilnebijêre.

³²Çimkî mirovê hîlekar li ber Xudan kirêt e, Lê Xudan bi dilrastan dişêwire.

³³Naleta Xudan li ser mala xeraban e, Lê warê rastan pîroz û bereket dike.

³⁴Ew tinazên xwe bi tinazkaran dike, Lê ji nefsbiçûkan re keremdar e.

³⁵Wê şehreza rûmetê mîras bistînin, Lê bêaqil wê herdem şermezar bibin.