Read Kurmanji Încîl Şîretên Silêman 30 Bible Online

Şîretên Silêman 30 - Kurmanji Încîl bible

Şîretên Silêman 30

¹Gotinên Agûrê kurê Yaqe, peyamek[17] e. Gotinên vî mirovî ev in: «Ez westiyam Xwedêyo, Ez westiyam Xwedêyo û tune bûm[18]!»

²Bi rastî, ez ji her kesî sexiktir im, Fêmdariya mirovan li ba min tuneye!

³Ne hînê şehrezayiyê bûm, Ne jî ez bi Yê Pîroz dizanim.

⁴Kî çû ezmanan û dîsa berjêr hat? Kê bayê di kulma xwe de civand? Kê av bi xiftanekî pêça? Kê tevahiya binê dinyayê danî? Navê wî çi ye? Navê kurê wî çi ye? Gelo tu zanî?

⁵Her gotina Xwedê pak e û hatiye ceribandin, Ew ji bo kesên xwe dispêrin wî mertal e.

⁶Tu tiştekî li gotina wî zêde neke, Yan na wê erzê te bişikêne û tê derewkar derkevî.

⁷Min du tişt ji te xwestin, Heta mirinê tu wan ji min texsîr neke:

⁸Hîlekarî û derewan ji min dûr bixe, Ne feqîriyê, ne jî dewlemendiyê bide min, Tenê nanê ku para min e, bi min bide xwarin.

⁹Neke ku ez têr bim, te înkar bikim û bêjim: «Xudan kî ye?» Ne jî bike ku ez feqîr bim, bidizim Û navê Xwedayê xwe bêrûmet bikim.

¹⁰Buxtana xulêm ji xweyê wî re neke Ku ew nifira li te neke û tu sûcdar nebî.

¹¹Nifş hene nifira li bavê xwe tînin Û pîrozkirina diya xwe nakin.

¹²Nifş hene di çavê xwe de paqij in, Lê ji qirêja xwe nehatine şûştin.

¹³Nifş hene çavê wan ewqas li jor e Ku qelpaxên wan jî bi quretiyê bilind dibin.

¹⁴Nifş hene diranên wan wekî şûran in, Kêlbên wan wekî kêran in Ku bindestên welêt û hejarên însanan daqurtînin.

¹⁵Du keçên zîlo hene, Ew dibêjin: «Bide, bide!» Sê tişt hene qet têr nabin, Çar tişt hene qet nabêjin: «Bes e»:

¹⁶Diyarê miriyan, zikê jina bêber, Axa ku bi avê têr nabe Û agirê nabêje: «Bes e.»

¹⁷Çavê kesê tinazan bi bavê xwe dike Û guhdariya dayika xwe kêm dibîne, Wê ji aliyê qijakên geliyan ve bê derxistin, Wê çêlîkên teyran wî bixwin.

¹⁸Sê tişt hene hişê min ranagire, Çar tişt hene ez ji wan fêm nakim:

¹⁹Li ezmanan riya teyran, Di nav keviran de riya maran, Di nav deryayê de riya gemiyan Û riya mêran ya bi keçan.

²⁰Riya jina zinakar jî wiha ye: Ew dixwe, devê xwe paqij dike Û dibêje: «Min tu xerabî nekiriye.»

²¹Sê tişt hene erd di bin wan de diheje, Çar tişt hene xwe li ber wan ranagire:

²²Xulamê dibe padîşah, ehmeqê têrbûyî,

²³Mêrkirina jina tê nefretkirin Û xizmetkara dikeve cihê xanima xwe.

²⁴Çar tişt hene li dinyayê biçûk in, Lê ew gelek şehreza ne:

²⁵Morîstank komeke ne hêzdar e, Lê qûtê xwe havînê kom dike,

²⁶Kurîbeşk komeke ne biqewet e, Lê qulên xwe di zinaran de çêdike,

²⁷Padîşahê kuliyan tuneye, Lê hemû ref bi ref bi hev re diçin

²⁸Û marmarok jî bi destan têne girtin, Lê dikevin qesra padîşahan.

²⁹Sê tişt hene rêveçûna wan baş in, Çar tişt hene çûna wan baş in:

³⁰Şêrê ku herî hêzdar ê heywanan e Û xwe ji pêş tiştekî nade alî,

³¹Tajî[19], nêrî û padîşahê artêşa wî pê re ye.

³²«Heger te bi xwebilindkirinê bêaqilî kiribe An jî te şêwra xerabiyê kiribe, Destê xwe bide ber devê xwe!

³³Çimkî çawa bi şidandina şîr nivişk çêdibe Û bi şidandina poz xwîn derdikeve, Bi şidandina hêrsê[20] jî pevçûn derdikeve.»