Read Kurmanji Încîl Şîretên Silêman 31 Bible Online

Şîretên Silêman 31 - Kurmanji Încîl bible

Şîretên Silêman 31

¹Gotinên Lemûêlê Padîşah ev in. Peyama[21] diya wî hînî wî kiriye, ev e:

²«Lawo! Ez çi bêjim? Ya kurê zikê min, çi bêjim? Ya kurê sozên min, çi ji te re bêjim?

³Qeweta xwe nede jinan, Ne jî riyên xwe bide kesên padîşahan helak dikin.

⁴Lemûêlo! Li padîşahan nakeve, Li padîşahan nakeve ku şerabê vexwin, Ne jî li mîr û began dikeve ku dixwazin meyê vexwin.

⁵Çimkî wê vexwin û qanûnan ji bîr bikin, Wê heqê hemû bindestan bixwin.

⁶Meyê bidin kesê li ber helakbûnê ye, Şerabê bidin canê bi kul û derd.

⁷Bila vexwe, ji bîr bike feqîriya xwe, Bila êdî neyine bîra xwe derdên xwe.

⁸Tu devê xwe ji bo bêzaran, Ji bo doza hemû bêkesan veke.

⁹Devê xwe veke! Dadgeriya bi edalet bike, Mafê bindest û hejaran biparêze.»

¹⁰[22]Kî dikare jina çê bibîne? Qîmeta wê ji cewheran gelekî zêdetir e.

¹¹Dilê mêrê wê pê ewle ye, Qezenca wî kêm nabe.

¹²Jina wî di hemû rojên jiyana xwe de Qenciyê lê dike, ne ku xerabiyê.

¹³Ew rîs û kitan peyda dike Û bi dil û can bi destê xwe çêdike.

¹⁴Wekî gemiyên bazirganan, Ew ji dûrî nanê xwe tîne.

¹⁵Beriya hilatina rojê, radibe Ku nanê maliyan û para xizmetkaran peyda bike.

¹⁶Dêhna xwe dide ser erdekî û dikire, Bi qezenca destê xwe rezekî datîne.

¹⁷Pişta xwe dişidîne Û zend û bendan xurt dike.

¹⁸Zane ku kirîn û firotin qenc e, Bi şev qendîla wê natefe.

¹⁹Dest davêje teşiya xwe, Bi kefa destan dizivirîne.

²⁰Mil dide bindestan, Dest dirêj dike li hejaran.

²¹Berf dibare lê ji bo maliyên xwe natirse, Çimkî ji bo tevahiya mala xwe du dest[23] cil hene.

²²Ew ji bo xwe rûber çêdike, Cilên wê kitanê tenik û binevşî ne.

²³Mêrê wê li dergehên bajêr tê naskirin, Û li wir bi rîspiyên welêt re rûdine.

²⁴Ew cilên kitanî çêdike û difiroşe, Piştênan dide taciran.

²⁵Hêz û qedir cilên wê ne, Bi xêr û xweşî li sibê dinêre.

²⁶Ew devê xwe bi şehrezayî vedike, Zimanê wê hînî dilovaniyê dike.

²⁷Hay ji mala xwe heye, Nanê tiraliyê naxwe.

²⁸Zarokên wê radibin û xweziya xwe pê tînin, Mêrê wê jî pesnê wê dide û dibêje:

²⁹«Gelek jin hene karên baş dikin, Lê tu di ser hemûyan re yî.»

³⁰Delalî derew e, bedewî pûç e, Lê jina ji Xudan ditirse hêjayî pesnê ye.

³¹Ji keda destê wê bidinê, Bila karên wê, li dergehên bajêr pesnê wê bidin.