Read Kurmanji Încîl Şîretên Silêman 4 Bible Online

Şîretên Silêman 4 - Kurmanji Încîl bible

Şîretên Silêman 4

¹Lawikno, şîreta bavan bibihîzin, Guhdar bin ku hûn fêmdar bin.

²Ji bo ku ez baş dersa we didim, Dev ji hînkirina min bernedin.

³Demekê ez kurê mala bavê xwe Û delal û yektayê dayika xwe bûm,

⁴Bavê min hînî min dikir û digot: «Bila dilê te bi gotinên min re be, Emrên min pêk bîne û bijî.

⁵Şehrezayiyê bi dest bixe, fêmdariyê jî. Ji bîr neke, gotinên min navêje pişt guhê xwe.

⁶Dev ji şehrezayiyê bernede, wê te biparêze. Jê hez bike, wê ji te re çavdêr be.

⁷Destpêka şehrezayiyê ev e: Şehrezayiyê bi dest bixe! Her tiştê te jî here, fêmdariyê bi dest bixe.

⁸Wê li ser serê xwe bigerîne, çimkî wê te bilind bike. Heger tu wê hembêz bikî, wê te birûmet bike.

⁹Wê taceguleke bedew deyne ser serê te, Wê taceke berz bide te.»

¹⁰Lawo, bibihîze û gotinên min bi dest bixe Ku salên jiyana te gelek bin.

¹¹Min di riya şehrezayiyê de tu hîn kirî, Min di rêçikên rast de tu rêve birî.

¹²Gava tu bimeşî, wê gavên te asteng nebin, Çaxê tu dibezî, tê neterpilî.

¹³Bi şîretê hişk bigire, wê bernede. Wê biparêze, çimkî ew jiyana te ye.

¹⁴Nede ser riya sûcdaran, Di rêçika xeraban de neçe.

¹⁵Xwe jê dûr bixe, ji riya wî derbas nebe, Jê bizivire û derbas be.

¹⁶Çimkî heta xerabî nekin, nikarin razên, Heger ew kesekî nedin terpilîn, xewa wan nayê.

¹⁷Ew nanê xerabiyê dixwin, Şeraba zordariyê vedixwin.

¹⁸Riya rastan wekî ronahiya berbangê ye Ku heta nîvro her diçe ronahiyê dide.

¹⁹Lê riya xeraban wekî taristana kûr e, Ew nizanin ji ber çi diterpilin.

²⁰Lawo, guhdariya gotinên min bike, Guh bide peyvên min.

²¹Bila ew ji ber çavê te winda nebin, Wan di dilê xwe de biparêze.

²²Çimkî ji bo kesên ew dîtin, jiyan in, Ji bo tevahiya bedena wan şifa ne.

²³Ji her tiştî bêtir, dilê xwe biparêze, Çimkî kaniyên jiyanê jê diherikin.

²⁴Derewên dêv nêzî xwe neke, Hîlekariya lêvan ji xwe dûr bixe.

²⁵Bila çavên te li pêş binêrin, Bila qelpaxên çavên te li pêşberî te bin.

²⁶Riya lingê xwe rast bike Ku hemû riyên te ewle bin.

²⁷Bi aliyê rastê û çepê ve averê nebe, Lingê xwe ji xerabiyê dûr bixe.