Read Kurmanji Încîl Şîretên Silêman 7 Bible Online

Şîretên Silêman 7 - Kurmanji Încîl bible

Şîretên Silêman 7

¹Lawo, gotinên min pêk bîne, Emrên min li ba xwe bihêle.

²Emrên min pêk bîne û bijî, Hînkirina min biparêze, wekî bîbika çavê xwe.

³Wan bike gustîl û bixe tiliya xwe, Li ser textê dilê xwe binivîse.

⁴Ji şehrezayiyê re bêje: «Tu xwişka min î!» Fêmdariyê meriva xwe bibîne

⁵Ku ew te ji jina çavlider Û ji zimanşîrîniya jina bêwefa biparêzin.

⁶Min ji pencereya mala xwe, Ji şibakeya xwe li derve nêrî

⁷Û di nav mirovên sexik, Di nav xortan de, Min xortekî kêmaqil dît.

⁸Ew di goşeya kuçeya wê jinikê re derbas dibû, Ber bi riya mala wê ve diçû.

⁹Gava bû êvar û roj çû ava, Gava tarî ket erdê,

¹⁰Va ye jinikek pêşwaziya wî kir. Ew wekî fahîşeyeke xemilandî û fêlbaz bû.

¹¹Ew jineke şerûd û serhişk e, Lingên wê li malê namîne.

¹²Li kuçe û kolanan e, Li serê her goşeyê kemînan datîne.

¹³Wê ew girt, ramûsa, Û bêyî ku şerm bike jê re wiha got:

¹⁴«Êdî ez mecbûr mam qurbanên aştiyê pêşkêş bikim[1], Min îro soza xwe pêk anî.

¹⁵Li ser vê yekê ez derketim Ku pêşwaziya te bikim Û li te bigerim. Va ye min tu dîtî!

¹⁶Min kincên rengîn ku ji kitanê Misrê ne Danîn ser nivîna xwe.

¹⁷Min mûr, ûd û darçîn, Bi ser nivîna xwe de wer kir.

¹⁸De were, em heta serê sibê hevşa bin, Em kêfa evîna xwe bikin.

¹⁹Çimkî mêrê min ne li mal e, Ew çûye riyeke dûr.

²⁰Wî kîsê pere xist destê xwe, Wê heta heyveronê venegere.»

²¹Wê bi gotinên balkêş ew qane kir, Bi zimanşîrîniya xwe ew da pey xwe.

²²Wekî gayê diçe ber kêrê, Wekî xezala dibeze dafikê, Ew mirov yekser ket pey wê.

²³Heta ku tîr kezeba wî qul bike, Ew wekî çivîka dikeve dafikê, Nizane ev yek wê bibe sedema mirina wî.

²⁴Niha lawikno, min bibihîzin, Guhdariya gotinên devê min bikin.

²⁵Nehêlin dilê we ber bi riya wê ve bizivire, Ber bi rêçikên wê ve averê nebin.

²⁶Çimkî zilamên bûne qurbanên wê gelek in. Hejmara kuştiyên wê zêde ne.

²⁷Mala wê riya diyarê miriyan e, Ew rê berjêrî odeyên mirinê dibe.