Read Kurmanji Încîl Waiz 1 Bible Online

Waiz 1 - Kurmanji Încîl bible

Waiz 1

¹Gotinên Waiz, kurê Dawid, Padîşahê Orşelîmê ev e:

²Waiz dibêje: «Çiqas pûç û vala ye. Her tişt pûç e.»

³Ma çi kara mirov heye, Ji hemû keda ku li ser rûyê erdê dide?

⁴Nifşek diçe û nifşek tê, Lê dinya her wek xwe dimîne.

⁵Roj dertê û roj diçe ava, Dîsa baz dide dera ku jê hilatiye.

⁶Ba bi başûr ve diçe, li bakur dizivire, Li hev dizivire û diçe Û her li cihê xwe dizivire.

⁷Hemû çem diherikin deryayê, Lê derya tije nabe Û av dizivire dera ku jê diherike.

⁸Her tişt bi westanê tije ye, Bi qasî ku nayê salixdan. Çav bi dîtinê têr nabe, Guh bi bihîstinê tije nabe.

⁹Berê çi bûbe, wê cardin ew bibe, Çi hatibe kirin, wê ew bê kirin, Li ser rûyê erdê tiştekî nû tuneye.

¹⁰Ma kesekî dikare bêje: «Binêre ev nû ye!»? Ji berê ve, ji sal û demên berê ve çêbûye.

¹¹Çawa nifşên berê nayên bibîranîn, Nifşên bê jî ji aliyê nifşên piştî wan ve Wê neyên bibîranîn.

¹²Ez Waiz, li Orşelîmê li ser Îsraîlê padîşah bûm.

¹³Min fikra xwe, ji bo ku bi şehrezayiyê li her tiştê ku li ser ruyê erdê pêk tên bixebite û lê bikole terxan kir. Ev karekî zehmet e. Xwedê ev da mirov ku pê re bilî bibe.

¹⁴Min hemû karên ku li ser rûyê erdê tên kirin dîtin û hemû jî pûç in, wek ketina pey bayê ne.

¹⁵Ya xwar nayê rastkirin, ya kêm nayê temamkirin.

¹⁶Min ji xwe re got: «Min şehrezayiya xwe, ji hemû yên ku beriya min li ser Orşelîmê padîşahî kirine gelekî zêdetir kir. Dilê min têra xwe zanîn û şehrezayî dît.»

¹⁷Min dilê xwe da zanîna şehrezayiyê û ez ji bo dînîtî û bêaqiliyê xebitîm. Min fêm kir ku ev jî wek ketina pey bayê ye.

¹⁸Çimkî di şehrezayiya zêde de kedera zêde heye û yê ku zanîna xwe zêde dike, derdê xwe bêtir dike.