Read Kurmanji Încîl Waiz 10 Bible Online

Waiz 10 - Kurmanji Încîl bible

Waiz 10

¹Mêşên mirî rûnê etaran genî û xera dikin, Piçek bêaqilî jî şehrezayî û rûmetê betal dike.

²Dilê mirovên şehreza li aliyê rastiyê ye, Dilê bêaqilan li aliyê şaşiyê ye.

³Di rabûn û rûniştinê de jî aqilê ehmeqan kêm e, Bêaqiliya xwe ji her kesî re kifş dikin.

⁴Heger hêrsa serwer li dijî te rabûbe, Tu bêhna xwe fireh bike, Çimkî nermbûn sûcên mezin dinixême.

⁵Xerabiyeke ku min li ser rûyê erdê dît heye, Ev şaşî ji aliyê desthilatdaran ve tê kirin:

⁶Bêaqilan li meqamên bilind, Dewlemendan li yên nizim didin rûniştin.

⁷Min dît ku kole li ser hespê, Lê serokên wan wek koleyan peya rêve diçûn.

⁸Yê ku çalê dikole, bi xwe dikevê, Yê ku di dîwêr de qulê vedike, mar pê vedide.

⁹Yê ku kevir dibire, ji kevir tehl dibe, Yê ku êzingan dibire, ji ber wan dikeve talûkê.

¹⁰Heger bivir kor be û nehatibe tûjkirin, Hê bêtir hêzê dixwaze, Lê ji bo serketinê, şehrezayî bi feyde ye.

¹¹Heger mar, beriya ku sêr bê kirin pê vede, Feyda sêrbaz qet tuneye.

¹²Gotinên mirovê şehreza wî rûmetdar dike, Lê lêvên yê bêaqil xwe wêran dikin.

¹³Destpêka gotina devê wan bêaqilî, Dawiya gotina wan dînîtî ye.

¹⁴Yê bêaqil gotinê dirêj dike. Kes nizane wê çi bibe, Ma wê kî jê re bêje, ka piştî wî çi bû?

¹⁵Keda bêaqilan wan diwestîne, Çimkî nizanin ku wê çawa herin bajêr.

¹⁶Ya welato, wey li halê te, Gava padîşahê te mîna zarok be Û serokên te serê sibê ziyafetê bidin.

¹⁷Ya welato, xwezî bi te, Gava padîşahê te esilzade ye Û serokên te ne ji bo serxweşbûnê, Lê ji bo ku xurt bibin, di demê de ziyafetê didin.

¹⁸Ji tiraliyê banî dipelişe, Ji sistiya destan, dilopên baranê dikevin hûndir.

¹⁹Ziyafet ji bo kenînê tê çêkirin, Şerab şahiyê dide jiyanê Û pere têra her tiştî dike.

²⁰Di dilê xwe de jî çêrî padîşah neke Û li oda razanê çêrî dewlemendan neke. Çimkî çivîka ezmanan deng dibe Û yên ku baskên wan hene peyvê radigihînin.