Read Kurmanji Încîl Waiz 5 Bible Online

Waiz 5 - Kurmanji Încîl bible

Waiz 5

¹Dema ku tu diçî Mala Xwedê, hay ji gavên xwe hebe. Çêtir e ku tu ji bo guhdarîkirinê nêzîk bibî, ne ku tu qurbana bêaqilan pêşkêş bikî. Çimkî ew nizanin ku xerabiyê dikin.

²Bi devê xwe nelezîne, Ne jî bila dilê te li ber Xwedê ji peyivînê re bilezîne. Çimkî Xwedê li ezmanan e, lê tu li erdê yî, Loma bila gotinên te hindik bin.

³Xema zêde dibe xewn, Gotina zêde jî bêaqiliyê tîne.

⁴Gava tu ji Xwedê re soz didî, bi derengî nekeve. Çimkî yên bêaqil ne bi dilê wî ne. Soza xwe pêk bîne.

⁵Di şûna ku tê nedir bikî û nedî, soz nede çêtir e.

⁶Rê nede devê xwe ku bi bedena te guneh bide kirin. Li pêş kahin[1] nebêje: «Min şaşîtî kir.» Wê çima bi gotina devê te hêrs bibe û karên destê te xera bike?

⁷Rast e ku xewneroj, pûçîtî û peyv pir in, lê tu ji Xwedê bitirse.

⁸Heger tu dibînî li welatekî zordestî li feqîran tê kirin, rastî û edalet tê binpêkirin, tu li vê yekê şaş nemîne. Çimkî di ser yê bilind de bilindtir heye û di ser wan de jî hê bilindtir hene.

⁹Feyda ku ji axê tê ji bo her kesî ye. Heger ji bo dabeşkirina berê axê padîşahekî dadperwer hebe, çêtir e. Padîşahê ku dixwaze erd û zevî werin cotkirin ji hemû welat re bi feyde ye.

¹⁰Kesê ku ji pere hez dike, ji pere têr nabe, Yê ku ji serwetê hez dike, qîma xwe bi qezenca xwe nayine. Ev jî pûç e.

¹¹Mal zêde dibe, kesên jê dixwin jî zêde dibin, Ji xeynî mêzekirinê, çi feyda wî ji xweyê wî re heye?

¹²Dixwazî hindik, dixwazî bila zêde bixwe, Xewa kesê ku dixebite şîrîn e. Lê zêdebûna malê yê dewlemend nahêle ku razê.

¹³Min li ser rûyê erdê belayeke xerab dît: Dewlemendiya ku ji xweyê xwe re bêxêr e tê civandin.

¹⁴Ev dewlemendî bi rastneçûna kar tune dibe. Xweyê wê bav be jî, Ji kurê xwe re tiştekî nahêle.

¹⁵Mirov çawa ji zikê diya xwe derkeve, Wekî ku hatiye, wê tazî here. Wê ji keda xwe tu tiştekî, Di destê xwe de bi xwe re nebe.

¹⁶Îcar çawa hatibe wê wisa here. Newxe ev jî belayeke xerab e, Ma çi kara mirov, Di keda ku di ber bayê de tê dayîn heye?

¹⁷Di hemû rojên xwe de di tariyê de dixwe, Gelek aciz dibe, hêrs dibe û nexweşiya wî heye.

¹⁸Îcar min dît ya baş ev e: Mirov bixwe û vexwe û li vê dinyayê, di rojên Xwedê de, ji bo hemû keda ku daye şa bibe. Çimkî para mirov ev e.

¹⁹Heger Xwedê mal û dewlemendiyê bide mirovekî û bike ku ew bikare jê bixwe, para xwe jê bistîne û bi keda xwe şa bibe, ev diyariya Xwedê ye.

²⁰Îcar mirov li ser rojên jiyana xwe pir nafikire, ji ber ku Xwedê dilê mirov bi şahiyê mijûl dike.