Read Kurmanji Încîl Waiz 8 Bible Online

Waiz 8 - Kurmanji Încîl bible

Waiz 8

¹Ma kî wek kesê şehreza ye? Kî bi maneya tiştekî dizane? Şehrezayî rûyê mirov ronî dike Û mirûzê tirş diguhere.

²Şîreta min li te: Ji ber sonda ku te li ber Xwedê xwar, emrê padîşah bîne cih.

³Nelezîne ku tu ji hizûr û xizmeta padîşah herî. Nehêle ku tu bikevî rewşeke xerab. Çimkî dilê padîşah çi bixwaze wî dike.

⁴Di gotina padîşah de hêz heye. Ma kî dikare jê re bêje: «Tu çi dikî?»

⁵Kesê ku emrê wî tîne cih, tiştê xerab nayê serê wî. Dilê zilamê şehreza dizane ku Wê kengê çi bike.

⁶Çimkî dem û rêbaza her karî heye, Dîsa jî derdê mirov ji serê wî zêde ye.

⁷Ya ku wê çêbe nayê zanîn, Kî dikare bêje wê çawa çêbe?

⁸Ne hêza kesî li ser girtina bayê heye, Ne jî li ser roja mirinê. Di şer de çûna malê tuneye. Heta xerabî jî nikare xerabkaran rizgar bike.

⁹Min ev hemû dîtin û min serê xwe li ser hemû tiştên ku li ser rûyê erdê çêdibin êşand. Çima wê hêza mirov hebe ku yên din biêşîne?

¹⁰Min dît ku yên xerab jî hatin veşartin. Ew diketin cihê pîroz û derdiketin û paşê li bajarê ku nebaşî dikirin dihatin pesinandin. Ev jî pûç e.

¹¹Ji ber ku karê xerab zûka nayê cezakirin, dilê mirov ji bo xerabîkirinê cesaretê bi xwe re dibîne.

¹²Kesê gunehkar sed caran xerabiyê bike û rojên xwe dirêj bike jî, dîsa ez baş dizanim ku wê qencî bi yên ku ji Xwedê ditirsin bibe. Çimkî ew bi tirs li pêş wî disekinin.

¹³Lê wê qencî bi xeraban nebe û emrên wan ên ku wekî siyê ne, neyên dirêjkirin. Çimkî ew ji Xwedê natirsin.

¹⁴Li ser rûyê erdê tiştekî din ê pûç heye: Mirovên rast hene, tiştê tê serê wan, divê bê serê xeraban. Mirovên xerab jî hene, tiştê tê serê wan, divê bê serê rastan. Min got: «Ev jî tiştekî pûç e.»

¹⁵Îcar min pesnê şabûnê da. Çimkî ji bo mirov li ser rûyê erdê ji xwarin, vexwarin û şabûnê çêtir tiştek tuneye. Di hemû rojên ku Xwedê li ser rûyê erdê, di ber keda wî de daye wî ev e û wê ev jê re bimîne.

¹⁶Min bi dilê xwe xwest ku ez şehrezayiyê hîn bibim û karên ku tên kirin bibînim. Min dît ne bi şev û ne jî bi roj xew dikeve çavên mirov.

¹⁷Min ji hemû karên Xwedê fêm kir ku mirov, karên ku li ser rûyê erdê çêdibin nikare bizane. Mirov çiqas keda xwe birêje jî, dîsa vê yekê nabîne û pê dernaxe. Yekî şehreza bêje: «Min fêm kiriye jî, bi rastî wî jî pê dernexistiye.»