Read Kurmanji Încîl Helbesta Helbestan 2 Bible Online

Helbesta Helbestan 2 - Kurmanji Încîl bible

Helbesta Helbestan 2

¹Ez gula Şaronê me, Sosina newalê me.

²Di nav diriyan de sosin çawa be, Di nav keçan de yara min wisa ye.

³Di nav darên daristanê de dara sêvê çawa be, Di nav xortan de evîndarê min wisa ye. Ez li ber siya wî rûniştim, çi xweş bû, Tehma fêkiyê wî li ser devê min şîrîn bû.

⁴Wî ez birim mala ziyafetê. Ala wî ya li ser min hezkirin e.

⁵Bi nanikê mewîjan hêzê bidin min, Bi sêvan can bidin min, Çimkî ez nexweşê hezkirinê me.

⁶Bila destê wî yê çepê di bin serê min de be, Bi destê rastê jî min hembêz bike.

⁷Ya keçên Orşelîmê! Ez bi xezalên mê, Bi pezkoviyên mê, Bi we sond didim xwarin, Hezkirinê hişyar nekin û ranekin, Heta ew bixwaze.

⁸Va ye dengê evîndarê min, Li ser çiyayan dipengize, Li ser giran xwe hildavêje û tê.

⁹Evîndarê min wekî xezal û karê pezkoviyan e. Binêrin, li pişt dîwarê me disekine, Ji pencereyan li hûndir dinêre, Ji qefesan temaşe dike.

¹⁰Evîndarê min peyivî û ji min re got: «Yara min, delala min, rabe û were.

¹¹Va ye zivistan derbas bû, Baran derbas bûn û çûn.

¹²Li erdê kulîlk xuya dikin. Demên stranan hatin, Dengê qumriyan li diyarê me hat bihîstin.

¹³Darhejîr kerikên xwe dide, Mêw kulîlk didin, Bêhna xweş belav dikin. Yara min, delala min, rabe were.»

¹⁴Kevoka min a xwe di qulên keviran de, Keviyên zinaran de vedişêre. Bejn û bala xwe nîşanî min bide, Dengê xwe bi min bide bihîstin, Çimkî dengê te şîrîn, Bejn û bala te xweşik e.

¹⁵Roviyan ji bo me bigirin, Roviyên biçûk ên ku rezan xera dikin, Çimkî rezên me kulîlk vedan.

¹⁶Evîndarê min, ê min e, Ez jî ya wî me. Li nav sosinan pezê xwe diçêrîne.

¹⁷Gava dinya hênik bû, sî dirêj bûn, Delalê min, bibe wek xezal û were! Mîna karê pezkoviyên li ser çiya û zinaran vegere!