Read Kurmanji Încîl Helbesta Helbestan 4 Bible Online

Helbesta Helbestan 4 - Kurmanji Încîl bible

Helbesta Helbestan 4

¹Ax tu çi delal î, yara min, Ax tu çi delal î! Çavên te di pişt xêliyê de Wek kevokan xuya dikin. Keziyên te wek keriyê bizinan e Ku ji pala Çiyayê Gîladê tên xwarê.

²Diranên te, wek keriyê miyan in Ku nû hatine şûştin û hevringkirin. Hemû jî cêwî ne, Yek ji wan jî neketiye.

³Wek şerîdên sor in lêvên te, Çi xweşik e devê te. Di pişt xêliyê de dêmên te, Wek şeqê hinarê xuya ne.

⁴Stûyê te dişibe birca Dawid Ku ref bi ref hatiye çêkirin. Li serî hezar mertal daleqandî, Mertalên mêrxasan hemû jî.

⁵Herdu memikên te, wek cotek karxezal, Mîna cêwîkên xezalekê ne Ku di nav sosinan de diçêrin.

⁶Gava dinya hênik bû Û sî dirêj bû, Ezê herim çiyayê mûrê, Herim girê guniyê.

⁷Her dera te delal e, yara min, Tu kêmahiya te tuneye.

⁸Bi min re ji Lubnanê were, bûka delal, Bi min re ji Lubnanê were. Ji serê Çiyayê Amanayê, Ji serê Senîr û Hermonê, Ji şikeftên şêran, Ji çiyayên pilingan berjêr be.

⁹Te dilê min dizî, dotmama min, bûka delal. Te bi nêrîneke çavên xwe, Bi zincîreke gerdena xwe dilê min dizî.

¹⁰Hezkirina te çi xweş e, dotmama min, bûka delal. Hezkirina te ji şerabê, Bêhna miska te, Ji her cure biharatan xweştir e.

¹¹Hingiv diherike ji lêvên te, bûka delal. Şîr û hingiv di bin zimanê te de ye. Bêhna Lubnanê tê ji kincên te.

¹²Bexçeyekî girtî ye dotmama min, bûka delal, Kaniyeke girtî û morkirî.

¹³Şitlên te wek bexçeyê hinaran, Bi fêkiyên xweş, Bi hine û simbilê,

¹⁴Bi simbil û bi zefranan, Bi qamîşê bêhnxweş û darçînê, Bi her cure dara guniyê, Bi mûr û ûdê, Bi her cure biharatên xweş.

¹⁵Tu kaniyeke bexçeyê yî, Bîreke avên teze Û robarek î ku ji Lubnanê diherike.

¹⁶Hişyar be, bayê bakur! Tu jî were, bayê başûr! Bi ser bexçeyê min de were Ku bêhna wî ya xweş bifûre. Bila evîndarê min were bexçe Û ji fêkiyên wî yên xweş bixwe.