Read Kurmanji Încîl Helbesta Helbestan 5 Bible Online

Helbesta Helbestan 5 - Kurmanji Încîl bible

Helbesta Helbestan 5

¹Ez ketim bexçeyê xwe, dotmama min, bûka delal! Min mûra xwe da hev bi biharata xwe, Min şana xwe, tevî hingivê xwe xwar. Min şeraba xwe, tevî şîrê xwe vexwar. Hevalno bixwin, vexwin! Ji hezkirinê kêfxweş bin, evîndarno!

²Ez radizam, lê dilê min şiyar bû. Guhdar bin, evîndarê min li derî dixe! «Derî li min veke, dotmama min, yara min, Kevoka min a bêqisûr! Ji xunavê şil bû serê min, Ji dilopên şevê porê min.»

³Min kirasê xwe deranî, Ezê çawa dîsa li xwe bikim? Min lingên xwe şûştin, Ezê çawa dîsa wan qirêj bikim?

⁴Evîndarê min destê xwe di qula derî re deranî, Dilê min ji bo wî hilperikî.

⁵Rabûm ku derî ji evîndarê xwe re vekim. Mûr bi ser destê min de herikî, Bi ser tiliyên min de rijiya Ser destiyê şopikê.

⁶Min derî ji evîndarê xwe re vekir, Lê evîndarê min rabûbû çûbû. Gava peyivîbû, min xwe winda kiribû. Ez lê geriyam, lê min nedît. Min gazî wî kir, lê bersiv neda.

⁷Nobedar li bajêr rastî min hatin. Li min xistin, ez birîndar kirim. Wan nobedarên sûran, xêliya min rakir.

⁸Ya keçên Orşelîmê! Ez sond bi we didim xwarin, Heger we evîndarê min dît, Jê re bêjin, ez nexweşê hezkirinê me.

⁹Ma ferqa evîndarê te ji yên din çi ye? Jina herî delal! Ferqa evîndarê te ji yên din çi ye Ku tu me wisa didî sondê?

¹⁰Evîndarê min rûsor û spî ye, Di nav deh hezaran de bijare ye.

¹¹Serê wî ji zêrê xas e. Porê wî jî xelekî ye Û wek rengê qijakê reş e.

¹²Çavên wî, wek kevokên li ber çeman in Ku bi şîr hatine şûştin. Herdu jî lihevhatî ne

¹³Dêmên wî wek mişara kulîlkên bêhnxweş e, Lêvên wî sosinî ne Ku wekî rûnê mûrê diherike.

¹⁴Zendên wî, wek lûleyên zêrîn ên bi fîrûze nexşkirî ne. Gewdeya wî, wek ji diranê fîlan çêkirî Ya bi kevirên lapîsê xemilandî ye.

¹⁵Teşkên wî stûnên mermerî ne, Li ser piyên zêrê xas danîne. Bejin û bala wî wek Lubnanê, Wek dara sedrê ya bijare ye.

¹⁶Devê wî gelek şîrîn e, Her dera wî xweş e. Wisa ye evîndarê min, Wisa ye hevalê min, Ya Keçikên Orşelîmê.