Read Kurmanji Încîl Helbesta Helbestan 6 Bible Online

Helbesta Helbestan 6 - Kurmanji Încîl bible

Helbesta Helbestan 6

¹Jina herî delal, Evîndarê te bi ku ve çû? Evîndarê te bi kîjan aliyê ve çû? Em jî bi te re lê bigerin.

²Evîndarê min çûye bexçeyê xwe, Mişara kulîlkên bêhnxweş Ku pez biçêrîne û sosinan bicivîne.

³Ez ya evîndarê xwe me, Ew jî yê min e. Li nav sosinan pez diçêrîne.

⁴Yara min, tu wekî Tîrsayê delal î, Wekî Orşelîmê xweşik î. Wekî artêşa ala xwe vekiriye, biheybet î.

⁵Tu çavên xwe ji ser min bide alî, Wan ez têk birim. Keziyên te, wek keriyê bizinan e Ku ji pala Gîladê tên xwarê.

⁶Diranên te, wek keriyê miyan in Ku nû hatine şûştin. Hemû jî cêwî ne, Yek ji wan jî neketiye.

⁷Dêmên te di pişt xêliyê de, Wek şeqê hinarê ne.

⁸Dibe ku li wir şêst şahbanû, Heştê cariye û bêhejmar keçên bakîre hebin,

⁹Lê kevoka min a bêqisûr, yekta ye. Ew yektaya diya xwe ye, Bîbika çavê dayika xwe ye. Keçikên ew dîtin gotin: «Xwezî bi wê.» Şahbanû û cariyên ew dîtin Pesnê wê dan.

¹⁰Ev jin kê ye? Nêrînên wê wek seherê, Wekî heyvê delal e, Wekî rojê dibiriqe, Wekî artêşa ala xwe vekirî ye, biheybet e.

¹¹Ez çûm bexçeyê gûzan Ku bibînim şaxên şîn ên newalan. Ka bibînim mêw gupik dane? Ka bibînim kulîlkên hinaran pişkivîne?

¹²Bêhemdê xwe, Daxwaza min ez li erebeyên şer ên gelê min siwar kirim.

¹³Vegere, vegere keça Şûlamî! Vegere, vegere em li te binêrin. Çawa ku kes li govenda Mahanayîmê[2] dinêrin, Çima hûn li keçika Şûlamî dinêrin?