Read Kurmanji Încîl Helbesta Helbestan 7 Bible Online

Helbesta Helbestan 7 - Kurmanji Încîl bible

Helbesta Helbestan 7

¹Lingên te di çaroxan de çiqas xweşik in, lê dotmîrê! Qorikên te yên gilover wek cewahir in, Karê destê hosteyan e.

²Navika te wek taseke gilover, Şeraba tevlihev jê kêm nabe. Zikê te mîna loda genim e, Bi sosinan rapêçandî ye.

³Herdu memikên te, wek cotek karxezal, Mîna cêwîkên xezalekê.

⁴Stûyê te wek birca ji diranê fîlan e, Çavên te mîna hewzên Heşbonê ne, Hewzên li ber dergehê Bat-Rabbîmê. Pozê te wek birca Lubnanê Ji jor ve li Şamê dinêre.

⁵Serê te, mîna Çiyayê Karmelê Li ser gewdeya te ye, Keziyên te binevşî, Padîşah bû êsîrê biskên te.

⁶Evînê! Tu bi qasî xweşik î, Ewqas jî şîrîn î. Hemû kêf ji te ne.

⁷Bejna te dişibe dara xurmê, Memikên te dişibin gûşiyên wê.

⁸Min got: «Ez herim ser dara xurmê, Bi çiqlên wê bigirim.» Bila memikên te wek gûşiyên tirî bin, Hilma te wek bêhna sêvê.

⁹Şeraba herî xas e devê te. Bila ew şerab rasterast here ba evîndarê min, Bila biherike lêv û diranan[3].

¹⁰Ez ya evîndarê xwe me, Daxwaza wî ez im.

¹¹Were evîndarê min, em herin mêrgan, Şeva xwe biborînin li holikan.

¹²Serê sibê em herin nav rezan Ku bibînin mêwê gupik dane, Kulîlk dane, Kulîlkên hinaran pişkivîne. Li wir ezê evîna xwe pêşkêşî te bikim.

¹³Sêvikên evînê xweş bêhn didin. Li serdêrên me, Her cure fêkiyên bijare, Hişk û ter hene. Min ji bo te civandin, evîndarê min.