Read Kurmanji Încîl Helbesta Helbestan 8 Bible Online

Helbesta Helbestan 8 - Kurmanji Încîl bible

Helbesta Helbestan 8

¹Xwezî tu birayê min bûyayî, Ji pêsîrên diya min şîr vexwarîbûyayî. Gava li derve min tu bidîta, minê tu ramûsayî Û tu kesan ez kêm nedidîtim.

²Minê bida pêşiya te Û te bibira mala diya xwe, Diya min a ku ez hîn kirime. Minê şeraba bi biharat û avhinara xwe Bi te bida vexwarin.

³Bila destê wî yê çepê di bin serê min de be, Bi destê rastê jî min hembêz bike.

⁴Ya keçên Orşelîmê! Ez bi we sond didim xwarin, Hezkirinê hişyar nekin û ranekin, Heta ew bixwaze.

⁵Ev kî ye ji çolê tê? Ev kî ye xwe spartiye evîndarê xwe? Min li bin dara sêvê tu hişyar kirî, Li wir diya te êşa te kişand, Li wir jina ku te anî dinyayê êş kişand.

⁶Tu min wekî morekî deyne ser dilê xwe, Wekî morekî deyne ser zendê xwe. Çimkî hezkirin wekî mirinê hêzdar e, Dilketin wekî diyarê miriyan dijwar e. Pêta wê wekî pêta êgir Dişewitîne û diqedîne.

⁷Pêlên mezin nikarin hezkirinê bitefînin, Ne jî lehî dikarin wê bi xwe re bibin. Mirovek hemû hebûna xwe ji bo hezkirinê bide, Wê dîsa jî kêm bê dîtin.

⁸Xwişkeke me ya biçûk heye, Hê memikên wê tunene. Roja ku wê bixwazin, Emê ji bo wê çi bikin?

⁹Heger ew sûrek bûya, Meyê li ser wê birceke zîvîn ava bikira. Heger ew deriyek bûya, Meyê bi textikên dara sedrê ew binixamta.

¹⁰Ez dîwar im, Memikên min jî bircên wê ne. Loma li ber çavê wî Ez bûm ya ku rihetiyê tîne.

¹¹Li Baal-Hamonê rezê Silêman hebû, Wî rezê xwe da kirê. Di ber berê wî de, her kirêdarekî hezar zîvan dida.

¹²Lê rezê min ê xumalî, Tenê ji bo min e. Bila hezar zîv ji te re bin, ya Silêman! Du sed zîv jî bila ji kirêdarên te re bin.

¹³Ya tu, jina ku li nav bexçeyan rûdine, Hevalên min guhdariya dengê te dikin. Bi min jî bide bihîstin.

¹⁴Delalê min, bibe wek xezal û bilezîne! Mîna karê pezkoviyên li ser çiyayên bêhnxweş were!