Read Kurmanji Încîl Îşaya 15 Bible Online

Îşaya 15 - Kurmanji Încîl bible

Îşaya 15

¹Peyama li ser Moavê: Ji ber ku bajarê Erê di şevekê de xera bû, Tune bû Moav. Ji ber ku bajarê Qîrê di şevekê de xera bû, Tune bû Moav.

²Mala Dîvon rabû, Ji bo girînê çû bilindciyên perizînê. Moav li ser Nebo û Mêdevayê dike zarîn, Her kes porê xwe, rihê xwe kur dike.

³Di kuçeyan de çûx li xwe dikin. Li serban û meydanan, Zarîna hemûyan, lehiya hêsiran.

⁴Heşbon û Êlele dikin hewar, Dengê wan digihîje heta Yahasê. Loma çekdarên Moavê diqîrin, Canê wan dilerize.

⁵Dilê min ji bo Moavê dike hewar, Filitiyên wan direvin Soarê, Direvin Eglat-Şelîşiyayê. Di Hevrazê Lûhîtê de, Bi girî hildikişin. Di riya Horonayîmê de, Hewarê li ser şikestina xwe dikin.

⁶Avên Nimrîmê ziwa bûn. Giya çilmisî, Giyayê teze nema, Şînahî êdî tune bû.

⁷Loma serweta wan stand û da hev, Di ser Geliyê Spîndaran re hildidin û dibin.

⁸Hewara wan sînorên Moavê rapêça. Zarîna wan gihîşt Eglayîmê, Zarîna wan gihîşt Bîr-Elîmê.

⁹Ava Dîmonê bi xwînê tije bû, Lê ezê hê zêdetir bînim serê wê, Ezê şêrekî bişînim ser filitiyên Moavê, Ser kesên li welêt sax mane.